Qazaqstannyń birinshi, álemniń 35-raketkasy Aleksandr Býblik Aýstraliia ashyq chempionatynyń ekinshi ainalymyna shyqty, dep habarlaidy QazAqparat.
Qazaqstandyq tennisshi bastapqy kezdesýin dúniejúzilik reitingte 141-orynda turǵan amerikalyq Ernesto Eskobedomen ótkizdi.
Bir qyzyǵy, amerikalyq tennisshini irikteý saiystarynyń finalynda Mihail Kýkýshkin 6:4, 5:7, 7:5 esebimen utqan bolatyn.
Soǵan qaramastan, Eskobedo jarysty uiymdastyrýshylardan arnaiy shaqyrtý alyp, negizgi dodaǵa qosyldy.
Býblik 24-te bolsa, qarsylasy odan bir jasqa úlken edi.
Birinshi partiiada amerikalyq tennisshi chempionatqa óziniń bos kelmegendigin baiqatty – 6:3.
Ekinshi sette tai-breikte Býblik sheberlik tanytty – 7:6 (7:5). Úshinshisinde de qarsylasyna des bergen joq – 6:3.
Tórtinshi partiiada qazaqstandyq tennisshi 3:0 esebimen alǵa ketti. Aqyry sol basymdylyǵyn saqtap qaldy – 6:3.
Býblik 2 saǵat 36 minýtqa sozylǵan tartysty báseke barysynda 24 eis jasap, 11 breik-pointtyń tórteýin óz esebine jazdy. Qarsylasy 3 eis, 2 breikten (9 breik-point) asa alǵan joq.
Otandasymyzdyń ekinshi ainalymdaǵy qarsylasy - myqty ári tájiribeli. Álemniń 20-synshy, chempionattyń 17-raketkasy, 35 jastaǵy frantsiialyq Gael Monfis alǵashqy ainalymda reitingte 64-oryndaǵy argentinalyq Federiko Koriany 6:1, 6:1, 6:3 esebimen ońai jeńdi.
Degenmen Býblik Monfisti kútpegen jerden 2020 jylǵy Frantsiia ashyq chempionatynyń alǵashqy ainalymynda 6:4, 7:5, 3:6, 6:3 esebimen utyp ketken bolatyn.
