Astana qalasyndaǵy №2 qalalyq aýrýhanada emdelýshi «quqyǵynyń taptalǵanyn» aityp Facebook paraqshasynda jazba qaldyrypty. Qulaǵyna operatsiia jasatyp, keiin palataǵa aýystyrylǵan Muqaǵali Balqybaev aýrýhana ishinde memlekettik tildiń qorlanǵanyn aityp, ashynyp otyr. Tipti qyzmetkerlerden qazaq tilinde sóileýin talap etkeni úshin tolyq emdelmei jatyp aýrýhanadan shyǵyp qalýy múmkin eken. Qamshy.kz aqparat agenttigi emdelýshimen tildesip, istiń mán-jaiyn anyqtapty.
Aitýynsha, 27 tamyz qulaǵyna operatsiia jasatyp, sol kúni keshke «Otolaringologiia» bólimshesiniń 9-palatasyna jatqyzylǵan. 28 tamyz memlekettik tildi qorǵaimyn dep óz dárigerinen dóreki sóz estigen.
«Tańerteń palatamyzǵa tazalyq qadaǵalaýshysy kelip, orys tilinde birnárse aitty. Men oryssha túsinbeitinimdi aityp, memlekettik tilde sóileýin talap ettim. Oǵan tolyq quqyǵym bar dep oilaimyn. Biraq álgi áiel ózime tap berdi. Qazaq tilinde sóilemeitinin aityp, dárigerime shaǵymdanypty. Biraz ýaqyttan keiin palataǵa Ashat Nikolaiuly keldi. Qazaq kisi edi. Meni qoldap, eń bolmaǵanda keshirim surar dep oiladym. Qiialym eken. «Saǵan kim qandai tilde sóilese, sen de sol tilde jaýap berýge tiissiń. Elbasymyz úsh tilde sóileý kerek dep eskertti. Qyzmetkerlerden qazaq tilinde sóileýin talap ete almaisyń!» dep adýyndy sóilei bastady. Biraq kónbesimdi baiqap aýrýhanadan shyǵaryp jiberemin dep qoqan-loqqy kórsetti. Tipti shyǵarý anyqtamalaryn da orys tilinde jazyp beretinin aitty. Memlekettik tilde sóileý bylai tursyn, ony qurmettemeitinderdi qalaisha jumysqa alady?», - dep ashýǵa býlyqty Muqaǵali.
Buǵan qosa, emdelýshiniń sózine sensek, aýrýhananyń ishinde ózińdi Reseidiń bir qalasynda júrgendei sezinesiń. Sebebi palata esikterindegi jazýlar túgeldei derlik tek orys tilinde jazylǵan. Kúiingen qazaq bul jaǵdaiǵa arasha túsetin namysshyl baýyrlarǵa úndeý saldy.
Al búgin odan soraqysy oryn alǵan kórinedi. Naýqastarǵa tańǵy astaryn ákelgen qyzmetshi de memlekettik tilden maqurym bolyp shyqty. Ol da qazaq tilde sóileýin talap etken emdelýshige dóreki jaýap qaitardy. Tańǵy asyn ýǵa teńegen Muqaǵali qazaq baýyrlarynan kómek surap otyr.
Bolǵan jaǵdai jeli qoldanýshylary arasynda rezonans týdyrdy. Biri qazaqtardy basynǵan orys tildilerge degen ashýyn bildirse, endi ózgesi zańda naqtylyq joq dep Konstitýtsiiany retteý kerektigin aityp, jar saldy.
