Óńirlik bas sanitar dárigerlerdiń erekshe shekteý sharalaryn engizýge quqyǵy bar. Bul týraly búgin QR Densaýlyq saqtaý ministri Eljan Birtanov aitty, dep habarlaidy QazAqparat.
«Sońǵy aptanyń derekteri boiynsha 6 óńirde ósim baiqaldy. Jaqynda vedomstvoaralyq komissiia otyrysyn ótkizdik. Kei óńirlerge qatysty aqparat berip jatyrmyz. Eń úlken ósim - Mańǵystaý, Batys Qazaqstan jáne Qyzylorda oblystarynda. Shyǵys Qazaqstanda ósim bolǵan. Biraq, qazir jaǵdai rettelip kele jatyr. Nur-Sultan qalasynda da ósim boldy. Qazir ósim 2 paiyzǵa tómendedi», - dedi ol Ortalyq kommýnikatsiialar qyzmetindegi brifing barysynda.
Osy rette ministr atalǵan jaitqa bailanysty ár óńirde erekshe shekteý sharalary engiziletinin aitty.
«Oǵan arnaiy quqyǵymyz bar. Óńirlik bas sanitar dárigerlerdiń qaýlysymen osyndai shekteýler kúshine enedi», - dedi Eljan Birtanov.
Onyń dereginshe, Atyraý oblysynyń Jylyoi aýdanyndaǵy Teńiz kenishinde ǵana koronavirýs juqtyrǵandardyń sany artyp tur. Biraq, óńirdiń basqa aýdandarynda jaǵdai birqalypty.
«Sondyqtan tek sol aýdanǵa ǵana shekteý sharalary engiziledi», - dedi ol.
