Búgin Aýǵanstannyń birneshe qalasynda qatarynan jarylys boldy, dep habarlaidy «QazAqparat» Aamaj News jańalyqtar agenttigine silteme jasap.
Eldiń ishki ister ministrligi taratqan málimet boiynsha alǵashqy jarylys Kabýldaǵy besinshi politsiia okrýginde bolǵan. Ol jerde eki bala jeńil jaraqattandy.
Ekinshi jarylys Balh provintsiiasynyń ortalyǵy Mazari-Shariftegi Seh Dokan meshitinde jamaǵat kúndizgi qulshylyqqa jinalǵan kezde boldy. Keminde 5 adam kóz jumyp, 65 adam jaraqattandy.
Al, Kýndýz qalasynda mina ornatylǵan avtokólik gýmanitarlyq kómek alý úshin jiylǵan kópshiliktiń ortasynda jaryldy. Aldyn ala berilgen málimette shamamen 30 adam zardap shekkeni aitylady.
Taǵy bir jarylys Nangarhar provintsiiasynda boldy. Sol mańnan ótip bara jatqan «Taliban» radikaldy qozǵalysynyń (Qazaqstanda tyiym salynǵan – red.) kóligindegi 4 sodyr qaitys bolyp, bireýi jaraqat alǵan.
Ázirge Aýǵanstan aýmaǵyndaǵy terroristik toptardyń eshqaisysy da jarylystar úshin ózine jaýapkershilik alǵan joq.
Aita keteiik, osydan eki kún buryn Kabýldyń batys bóligindegi mektepterde bolǵan birneshe jarylystan ondaǵan zardap shekken, ólgenderi de bar.
