Aýǵanstannyń eki para atleti Tokiodaǵy olimpiada aýylyna keldi. Olar kelesi aptada paralimpiada jarysyna qatysady. Bul týraly 28 tamyz kúni Halyqaralyq paralimpiada komiteti habarlady.
Thekvondoshy Zákiia Hýdadadi men jeńil atlet Hossein Rasýli Kabýldan Parijge ushyp, sol jerden Tokioǵa attandy dedi HPK.
Tokiodaǵy paralimpiada aýyly aýǵan sportshylaryn jyly qarsy aldy, dedi HPK óz málimdemesinde.
Olar Tokioǵa 17 tamyz kúni kelýi kerek bolǵan, biraq elindegi jaǵdaiǵa bailanysta jete almai qalǵan.
15 tamyz kúni tálipter Kabýlǵa kirip, Aýǵanstandy óz baqylaýyna alǵanyn málimdegen. Osydan keiin tálipterdiń repressiiashyl zańdarynan qoryqqan aýǵandar jappai Kabýl halyqaralyq áýejaiyna aǵylyp, el astanasynda dúrbeleń ornady. Paralimpiadaǵa qatysa almai qalýdan qoryqqan Hýdadadi video úndeý joldap, kómek suraǵan.
"Aýǵan áielderiniń ókili retinde bárińizden kómek suraimyn" dedi Hýdadadi videosynda. Reuters agenttigi bul videony Aýǵanstan paralimpiada komitetinen alǵanyn aitty.
Hýdadadi – 2004 jylǵy paralimpiadadan beri osy dodaǵa qatysqan alǵashqy aýǵan áieli. Ol 44-49 keli salmaqta synǵa túsedi. Rasýli erler arasynda 400 metrge júgiredi.
HPS prezidenti Endriý Parsons 12 kún buryn Aýǵanstan paralimpiada komiteti aýǵan para sportshylarynyń Tokioǵa jete almaityny týraly habarlaǵanyn aitqan.
Habarlama "paralimpiada qozǵalysyna qatysy bar adamnyń bárine aýyr tidi" dedi ol.
Biraq "ǵalamdyq operatsiianyń" arqasynda eki atlet Aýǵanstannan aman shyǵyp, Tokioǵa jetip otyr dedi Parsons.
Tokiodaǵy paralimpiada oiyndary 24 tamyz kúni bastalyp, 5 qyrkúiekke deiin ulasady.
