Aýǵanstandy teńdessiz qiyndyqtarmen jalǵyz qaldyrmaýymyz qajet. Bul týraly TMD uiymyna múshe memleketter basshylary keńesiniń kezekti otyrysynda Qazaqstan Prezidenti Qasym-Jomart Toqaev aitty, dep habarlaidy QazAqparat.
«Qazirgi zaman bolmysy TMD-nyń qaýipsizdik salasyndaǵy yntymaqtastyq tetikterin jetildirýdi talap etedi. Bul saladaǵy bizdiń ózara is-qimylymyzdyń negizgi kontýrasy Áskeri yntymaqtastyq tujyrymdamasynda, sonymen qatar 2025 jylǵa deiin syrtqy shekaranyń shekaralyq qaýipsizdigin nyǵaitý baǵdarlamasynda belgilengen. Buǵan qosa, júrgiziler jumysta terrorizm, dini ekstremizm, esirtki saýdasynan týyndaityn syn-qaterlerge birlesip qarsy turý máselelerine erekshe basymdyq berý qajet. Bul syn-qaterler Aýǵanstanda oryn alǵan jaǵdaiǵa bailanysty birinshi kezekti mánge ie bolyp otyr», - dedi Qasym-Jomart Toqaev.
QR Prezidentiniń atap ótýinshe, Qazaqstan aýǵan máselesinde BUU ustanymyn qoldaidy.
Bul eldegi kúrdeli gýmanitarlyq jaǵdai búkil álemdik qoǵamdastyqtyń nazarynda bolýy tiis. Bizdiń saiasi kózqarasymyz ben jeke nanym-senimimiz qandai bolsa da, Aýǵanstandy teńdessiz qiyndyqtarmen jalǵyz qaldyrmaýymyz qajet. Bul istegi naqty úles aýǵan halqyna gýmanitarlyq kómek bolmaq. Qazaqstan qazirdiń ózinde azyq-túlik pen birinshi qajetti taýarlardy jetkizýge kirisip ketti. Bul jumysty júieleý úshin Aýǵanstanǵa halyqaralyq kómek kórsetý jónindegi logistikalyq hab qurýdy usynamyz. Aýǵanstanǵa daǵdarystyń ótkir kezeńin eńsergennen keiin de BUU institýttary tarapynan munan arǵy da júieli qoldaýdyń qajet bolatyndyǵy sózsiz. Osynaý mańyzdy mindetke biz usynyp otyrǵan Almatyda BUU-nyń óńirlik ortalyǵyn qurý týraly bastama jaýap bere alady. Dostastyq elderiniń osy josparlardyń júzege asyrylýyna járdem beretindigine úmittenemiz», - dedi Memleket basshysy.
