Aýǵanstannyń shyǵysynda magnitýdasy 6,1 jer silkinisi boldy. Sonyń nátijesinde kem degende 920 adam qaza taýyp, kemi 600 adam jaralanǵan, dep habarlaidy Azattyqtyń Aýǵan qyzmeti "Taliban" úkimetine silteme jasap.
AQSh geologiia qyzmetiniń habaryna qaraǵanda, 22 maýsym tańerteń bolǵan jer silkinisiniń oshaǵy — Aýǵanstan astanasy Kabýldyń ońtústik jaǵy, Pákistanmen shekaradaǵy Host qalasynyń mańy.
Eýropa Jerorta teńizi seismologiia ortalyǵynyń aqparatyna qaraǵanda, jer silkinisi oshaǵynan 200 shaqyrymdaǵy Kabýl qalasynda da silkinis qatty baiqalyp, dúmpý qaitalanǵan. Jer dúmpýin Hosttan 300 shaqyrymdaǵy Pákistannyń astanasy Islamabad qalasy da sezgen.
Pákistannyń meteorologiiia qyzmeti jer silkinisiniń magnitýdasyn 6,1 dep baǵalaǵan.
