Aýǵanstanda sý tasqyny saldarynan qaza tapqandar sany beisenbi kúni 150 adamǵa jetti.
El biligi taýdaǵy Parvan provintsiiasynda nóser jańbyrdan oryn alǵan sý tasqyny saldarynan 900-den astam otbasyny qaýipsiz jerge kóshirdi. Bul týraly Gulf Today agenttigi habarlaidy.
Kem degende 250 adam jaraqat aldy.
Tiri qalǵandardyń aitýynsha, qaza bolǵandar arasynda balalar kóp. Tabiǵi apat saldarynan qaza tapqandar sany áli de ósýi múmkin.
Aýǵanstan aýdandary qurǵaqshylyqtan da, ońtústikaziialyq mýsson kezeńindegi tolassyz jańbyrdan da únemi zardap shegip otyrady.
Jergilikti turǵyn 45 jastaǵy sharýa Muhamed Qasym AFP-ǵa sý tasqyny saldarynan otbasynyń 11 múshesi qaitys bolǵanyn aitty. «Meniń ápkem, onyń kúieýi, eki qyzy men olardyń balalary bir úide uiyqtap jatqan edi», - dedi Qasym.
Parvan provintsiiasy biliginiń aitýynsha, sý tasqyny Charikar qalasyn basqan, jergilikti aýrýhana jarym-jartylai qirady, jaraqat alǵan kóptegen adam Kabýl aýrýhanalaryna aýystyryldy.
Provintsiianyń baspasóz hatshysy Vahida Shakhar qurbandar sanynyń sany áli de ósýi múmkin ekenin málimdedi, sebebi qutqarý komandalary qiraǵan úilerdiń astynda qalǵan adamdardy izdeý jumystaryn júrgizýde.
Kem degende segiz adam, sonyń ishinde eki bala sýǵa batyp ketkeni, 14 adam jaraqat alǵany habarlanyp otyr.
Aýǵanstan prezidenti Ashraf Ǵani óz málimdemesinde qaza bolǵandardyń otbasylaryna kóńil aityp, Parvan jáne basqa provintsiialarǵa kómek jetkizýdi buiyrǵan.
Parvanda 2000-nan astam úi qirady, 1000-nan astam adam qaýipsiz jerge kóshirilgen.
Sondai-aq, Nangarhar, Pandjshir, Vardak, Loghar, Paktika jáne Kapisa provintsiialarynda da aiaqasty oryn alǵan sý tasqyny týraly habarlandy.
Aýǵanstanda nóser jaýyn men aiaqasty sý tasqyny saldarynan jyl saiyn ondaǵan adam qaza tabady.
Buǵan deiin osy aida eldiń shyǵysyndaǵy Nangahar provintsiiasynda oryn alǵan sý tasqyny saldarynan 16 adam, sonyń ishinde 15 bala qaza tapty. Ondaǵan úi qirap qaldy.
