Kabýl qalasynda eki kandidat Aýǵanstan prezidenti qyzmetine kiriskenin bildiretin saltanatty rásimdi qatar ótkizdi. Qazirgi is basyndaǵy memleket basshysy Ashraf Ǵani prezident saraiynda ant qabyldady. Dál sol ýaqytta kórshiles saraida ózin "prezident sailaýynda jeńdim" dep jariialaǵan premer-ministr Abdýlla Abdýllanyń saltanatty ulyqtaý rásimi ótti.
Aýǵanstandaǵy prezident sailaýy 2019 jyldyń 28 qyrkúieginde ótken. Qorytyndysy bes aidan soń, 2020 jyldyń 18 aqpanynda jariialanǵan. Aýǵanstan sailaý komissiiasynyń qorytyndysy Ashraf Ǵani 50,64 paiyz daýyspen jeńdi dep kórsetken. Onyń jeńisin álem qaýymdastyǵy moiyndaǵan.
Abdýlla Abdýlla 39,52 daýyspen ekinshi orynǵa toqtady. Sailaý qorytyndysyn moiyndaýdan bas tartqan ol óz úkimetin qurýdy josparlap otyr.
Aýǵanstanda qos úkimet "Taliban" qozǵalysymen kelissóz qarsańynda paida bolǵaly tur. "Taliban" ókilderi 29 aqpanda AQSh-pen bitimge qol qoiǵan. Bitim qujatynda halyqaralyq koalitsiia kúshteriniń Aýǵanstannan shyǵarylatyny kózdelgen. Tálipter ózderi baqylaityn aýmaqta terroristerdi panalatpai, Aýǵanstan úkimetimen kelise jumys isteýge mindettengen.
NBC telearnasy joǵary laýazymdy sheneýnikterge siltei otyryp, AQSh barlaý málimetteri "tálipterdiń bitim shartyn oryndamaitynyn, shetel áskeri aýǵan jerinen shyǵysymen úkimet áskerine shabýyl jasaýy múmkin ekenin" habarlady. Qazir tálipter aýǵan jeriniń jartysyna jýyǵyn baqylap otyr.
