"Taliban" qarýly toby ózderi basyp alǵan Gerattaǵy úkimet ǵimaratynyń mańynda júr. 13 tamyz 2021 jyl.
Aýǵanstandaǵy "Taliban" radikal qozǵalysy keń aýqymdy shabýyldary barysynda Aýǵanstannyń úsh iri qalasy men birqatar ýálaiat ortalyqtaryn basyp aldy. Endi tálipter el astanasy Kabýlǵa qaýip tóndirip tur, dep jazady Azattyq.
Keiingi kúnderi "Taliban" sodyrlary eldiń turǵyn halyq sany boiynsha ekinshi jáne úshinshi iri qalalary sanalatyn Gerat pen Qandaǵardy, sondai-aq Gilmend ýálaiaty ortalyǵy Láshkergahty basyp aldy. Buǵan qosa 13 tamyzda "Taliban" qarýly qoly eldiń ońtústigindegi Zabýl men Ýrýzgan ýálaiattarynyń ortalyǵyn da baqylaýyna alyp, batystaǵy aimaq ortalyǵy Gorǵa da biligin ornatty.
"Taliban" Kabýldan shamamen 80 shaqyrym jerde ornalasqan ortalyq Logar ýálaiatynyń ortalyǵy Pýli-Alam qalasyn, oǵan jaqyn mańdaǵy Ǵazni qalasyn basyp alǵan. Tálipterdiń Qandaǵar men Geratty alýy mamyr aiynda AQSh bastaǵan sheteldik koalitsiia kúshteri Aýǵanstannan kete bastasymen kirisken keń aýqymdy shabýylyn bastaǵannan bergi ýaqyttaǵy eń iri jeńisi sanalady.
"Taliban" qazir Aýǵanstannyń 34 aimaǵynyń ortalyqtarynyń jartysyn jáne aýyldyq aimaqtardyń úshten eki bóligine ústemdik ornatqan. Al el úkimeti qolynda aýǵan astanasy jáne eldiń ár jerinde ózara bytyrai qonys tepken deýge keletin, qorǵanys áleýeti osal birqatar qala ǵana qalyp otyr. Qazir basty nazar Kabýlǵa aýyp, jurtshylyq bul qalanyń taǵdyry ne bolar eken dep alańdap otyr.
Pentagonnyń baspasóz hatshysy Djon Kirbi "Taliban" qarýly jasaǵy "Kabýldy qorshaýǵa tyrysyp jatqanyn", biraq qazirgi ýaqytta qala "qaýipti qursaýǵa túspegenin" aitty.
