Aýǵanstan aýdandarynyń basym bóligin basyp alǵan "Taliban" Kabýl túbine jetkende Aýǵanstan prezidenti Ashraf Ǵani elden ketti. Muny Aýǵanstannyń ulttyq bitim jónindegi joǵary keńesiniń tóraǵasy Abdýlla Abdýlla rastady.
"Ol eldi, halyqty qiyn-qystaý kezeńde qaldyryp ketti. Qudaidyń aldyna jaýap berer" dedi Abdýlla halyqqa arnalǵan video úndeýinde Ashraf Ǵanidi meńzei otyryp.
Abdýlla Abdýlla Kabýl turǵyndaryn dúrlikpeýge shaqyrdy. Ol sondai-aq tálipterden saiasi máseleler sheshilgenshe qalaǵa kirmeýdi surap, munyń beibit turǵyndar qaýipsizdigi úshin qajet ekenin aitty.
"Taliban" aýǵan astanasyna kúshpen kirmeitinin aitqan. Osy tusta tálipter men aýǵan úkimeti arasynda qalany beibit jolmen berý máselesi talqylanyp jatqany habarlanǵan. Biraq tálipterdiń baspasóz hatshysy keiinirek sodyrlarǵa qalaǵa kirý buiyrylǵany, munyń qalany tonaýǵa jol bermeý úshin qajet ekenin aitty.
"Taliban" baspasóz hatshysy Zabiýlla Mýjahid bul málimdemesin Ashraf Ǵani elden kete sala aitty.
Irandyq Tasnim aqparat agenttiginiń málimetinshe, Ashraf Ǵani Tájikstanǵa ketken. Tájikstan biligi bul týraly ázirge pikir bildirmedi.
Baspasóz habarlaryna qaraǵanda, Kabýl kóshelerinde abyrjý baiqalady. Turǵyndardyń bir bóligi qaladan ketýdiń qamymen júr. Úkimet qurylymdarynyń qyzmetkerleri qashyp, ákimshilik keńseler, politsiia ýchaskeleri, ásker bólimderi jabylyp jatyr. Dúkender men bazarlar jumysyn toqtatty.
15 tamyz kúni tańerteń tálipter Jalalabad qalasyn soǵyssyz aldy. Osydan keiin Kabýl úkimet baqylaýyndaǵy jalǵyz iri qala bolyp qaldy. Osydan keiin tálipterdiń qolyna Vardak ýálaiatynyń ortalyǵy Maidanshahr qalasy ótti. Olar sondai-aq Bamian men Nili qalalaryn da aldy. Tálipterdiń ózi Kabýl túbindegi Bagram áýe bazasyn, túrmeni basyp alǵanyn málimdedi. Osyǵan deiin "Taliban" Mazari-Sharifti óz baqylaýyna alǵan. Osylaisha tálipter Aýǵanstandaǵy 34 ýálaiattyń basym bóligine biligin ornatty.
Tálipterdiń aýǵan aýdandaryn úlken kúshpen jaýlap alýy 1 mamyrda AQSh bastaǵan halyqaralyq koalitsiia elden shyǵýǵa kiriskende bastaldy. Batys kúshteri elden osy aidyń sońyna deiin tolyq ketýi kerek bolǵan.
AQSh prezidenti Djo Baiden áskerdi áketý týraly sheshimin durys ekenin qaita málimdedi. Ol Aýǵanstanda AQSh áskerin ustaýǵa eshqandai negiz joǵyn aitty.
