Prezident Ashraf Ǵani kezinde Aýǵanstan Ortalyq bankin basqarǵan Ajmal Ahmadi tálipter biligi eleýli ekonomikalyq qiyndyqqa kezigedi dep sanaidy.
22 tamyzda Bloomberg agenttiginiń Odd Lots podkastyndaǵy áńgime kezinde Ahmadi aldaǵy ýaqytta ulttyq valiýta álsirep, infliatsiia kúsheiedi, import qymbattap, kapital qozǵalysyn baqylaý sharalary álsireidi degen boljam aitty.
Ahmadidyń sózinshe, AQSh Aýǵanstan Ortalyq bankiniń 9,4 milliard dollarǵa baǵalanatyn valiýta rezerviniń úlken bóligin buǵattady, bul onsyz da zardap shegip otyrǵan Aýǵanstan ekonomikasynyń jandy jerine tiedi.
Munan ózge Halyqaralyq valiýta qory da tálip úkimetin halyqaralyq kreditorlar resýrsynan aiyrdy. Onyń ishinde Aýǵanstanǵa biyl 23-tamyzda berilýi tiis jarty milliard dollar da bar.
COVID-19 indeti jailaǵan Aýǵanstan qazirdiń ózinde qýańshylyqtyń zardabyn tartyp otyr. "Jaǵdai shynynda da óte aýyr, biz buǵan deiin úsh qaýippen kúresip kelsek, oǵan tórtinshisi qosyldy", – deidi Ahmadi.
Dúniejúzilik bank málimetine qaraǵanda, Aýǵanstan – álemde memlekettik biýdjetiniń tórtten úshi shetel kómeginen quralatyn kedei elderdiń biri. Tálipter kezinde shetel kómegi toqtap qalýy múmkin.
"Tálipter Qytaidan, Pákistannan nemese osy óńirdegi basqa da elderden aqsha suraýy múmkin. Jaǵdai qiyn", – dedi Ahmadi.
Tamyzdyń 15-ine "Taliban" qozǵalysy Kabýldy soǵyssyz alǵan soń, Aýǵanstan biligin ielengenin málimdegen. Tálipter qýǵyn-súrginge sala ma dep qaýiptengen aýǵan azamattary shetelge ketý úshin Kabýl áýejaiyna jappai umtylyp, dúrbeleń týǵan. "Taliban" qozǵalysy qarsylastaryna raqymshylyq jasaýǵa, eshkimdi qýdalamaýǵa ýáde bergen. Alaida Aýǵanstannyń kei túkpirlerinde burynǵy úkimetke jumys istegen adamdardy jazalap jatqany jaily túrli habar taraǵan.
