Memleket basshysy Qasym-Jomart Toqaev Aýǵanstan halqyn gýmanitarlyq daǵdarys qaterimen jekelei qaldyrýǵa bolmaitynyn aitty, dep habarlaidy QazAqparat.
«Álemde bolyp jatqan oqiǵalar terrorizm, ekstremizm, transulttyq qylmys qazirgi zamannyń ózekti syn-qateri retinde qalyp otyrǵanyn kórsetip tur. Bul jaǵdaida Aziiadaǵy ózara is-qimyl jáne senim sharalary keńesi (AÓISShK) qyzmeti erekshe ózekti bolady. Qazaqstan forýmnyń is basyndaǵy tóraǵasy bolyp otyr jáne AÓISShK keńistiginde qaýipsizdik pen yntymaqtastyqty nyǵaitý úshin barsha kúsh-jigerin salady. Forýmnyń institýtsionaldy ary qarai damýy, onyń halyqaralyq uiymǵa transformatsiiasy bul jumysqa jańa serpin beredi dep sanaimyz», - dedi Qasym-Jomart Toqaev «Ortalyq Aziia – Úndistan» sammitinde.
QR Prezidenti Aziiadaǵy ózara is-qimyl jáne senim sharalary keńesiniń áleýeti men mártebesin nyǵaitýda Úndistannyń róli aýqymdy ekenin atap ótti.
«Osy jyly AÓISShK-niń mereitoilyq sammiti ótedi. Osy oraida Modi myrzany (Úndistan Premer-ministri Narendra Modi) Qazaqstan astanasynda kóretinimizge úmittenemiz. Forým aiasynda talqylaýǵa shyǵarylatyn ózekti máselelerdiń qatarynda Aýǵanstan problematikasy da bolady», - dedi Memleket basshysy.
Osy oraida Qasym-Jomart Toqaev Aýǵanstan men onyń halqyn teńdessiz qiyndyqtarymen jáne gýmanitarlyq daǵdarys qaterimen jekelei qaldyrýǵa bolmaitynyn qadap aitty.
Qazaqstan óz tarapynan azyq-túlik, qajetti taýarlarmen jáne dári-dármek túrindegi kómekti baǵyttai otyryp, Aýǵanstanmen ózara is-qimyldy jalǵastyryp keledi.
