Foto: Videodan skrin
Almaty áýejaiynda ózine órt qoiǵan 33 jastaǵy er adamǵa qatysty sotqa deiingi tergeý toqtatyldy. Bul týraly Kóliktegi politsiia departamenti habarlady.
Vedomstvonyń málimetinshe, er adam aýrýhanadan shyqqannan keiin eshkimge shaǵymy joq ekeni týraly jazbasha ótinish bergen.
«Atalǵan fakti boiynsha Qylmystyq kodekstiń 105-baby 1-bóligi (Ózin-ózi óltirýge deiin jetkizý, ózin-ózi óltirýge kóndirý nemese ózin-ózi óltirýge yqpal etý) boiynsha sotqa deiingi tergeý júrgizildi. Aýrýhanadan shyqqannan keiin azamat eshkimge shaǵymy joq ekenin jazbasha túrde málimdedi», — delingen resmi habarlamada.
Ishki ister organynyń málimetinshe, qajetti tergeý jáne jedel is-sharalar tolyq aiaqtalǵan, sondyqtan sotqa deiingi tergeý toqtatyldy.
Sonymen qatar, tergeý barysynda anyqtalǵan mán-jailarǵa bailanysty Almaty halyqaralyq áýejaiynyń aviatsiialyq qaýipsizdik qyzmetine quqyq buzýshylyqtarǵa yqpal etken kemshilikterdi joiý týraly usynys joldanǵan.
Eske sala ketsek, buǵan deiin áleýmettik jelilerde er adamnyń áýejai keńseleriniń birinde ústine suiyqtyq quiyp, óz-ózine ot qoiǵan sáti jariialanǵan edi. Oqiǵa ornyna jedel járdem shaqyrylyp, zardap shekken azamat №4 qalalyq klinikalyq aýrýhananyń jansaqtaý bólimine óte aýyr jaǵdaida jetkizilgen. Oqiǵanyń aldyn ala sebebi de atalǵan bolatyn.
