Aýdandar boiynsha, eldi mekenderde shóp shabý brigadalaryn qurý qajet. Eki kún ishinde barlyq aýdannyń jaǵdaimen tanysýǵa kelgen Aýyl sharýashylyǵy ministriniń mindetin atqarýshy Erbol Qarashókeev osylai dedi, - dep habarlaidy «Ult aqparat».
Ministrdiń mindetin atqarýshy aldymen qurǵaqshylyqtan zardap shegip, tótenshe jaǵdai jariialanǵan Aral aýdanyna at basyn buryp, jergilikti halyqpen jáne sharýashylyq basshylarymen kezdesti. Kezdesý barysynda memleket tarapynan kórsetilip jatqan kómekterge toqtalyp, aimaqtaǵy mal azyǵy máselesiniń sheshilý joldaryn pysyqtaldy.
«Birinshiden, Úkimet rezervinen Qyzylorda oblysyndaǵy qurǵaqshylyqtan zardap shekken sharýalardyń qystaǵyna jetkiziletin mal azyǵynyń qunyn arzandatý úshin ótken aptada 1,7 mlrd teńge bólindi. Qazir osy qarajatty barlyq sharýa qojalyqtaryna tamyz aiynyń ishinde jetkizý qajet. Ekinshiden, Azyq-túlik kelisimshart korporatsiiasy 490 tonna arpany naryqtaǵydan tómen baǵamen satty. Jalpy biyl jemdik astyq qoryn 370 myń tonnaǵa jetkizý josparymyzda bar. Úshinshiden, fermerlerdiń jem-shóp daiyndaýyna qosymsha arzandatylǵan janar-jaǵarmai bólinetin boldy. Qazir energetika ministrligimen barlyq máseleler pysyqtaldy. Tamyz aiynan bastap oblystarǵa suratylǵan limitteri boiynsha jetkiziletin bolady. Qyzylorda oblysyna 3,8 myń tonna limit bólindi», - dedi Erbol Qarashókeev.
Osy oraida aita keteiik, mal azyǵymen qamtamasyz etý máselelerin sheshýdi jyldam úilestirý úshin Aýyl sharýashylyǵy ministrligi janynan Respýblikalyq jedel shtab qurylǵan. Sonymen qatar, Ekologiia ministrligimen tabiǵi rezervat jerlerine mal jaiý jáne shóp shabý jóninde kelisim jasalǵan. Sondai-aq, qazirgi jaǵdaiǵa bailanysty fermerlerge qoldaý kórsetý úshin mal sharýashylyǵyn damytýǵa alǵan nesie tólemderin keiinge shegerý jóninde sharalar qabyldanady.
«Taǵy bir qýanyshty nátijeli jumysymyz, ministrlik tarapynan jaqynda mal sharýashylyǵyn sýbsidiialaý erejesine engizilgen ózgeristerge sáikes oblys boiynsha byltyrǵy jyly mal azyǵyna sýbsidiia ala almai qalǵan sharýa qojalyqtarynyń rezervtegi ótinimderi qanaǵattandyrylatyn boldy. Bul maqsatqa oblys biýdjetinen 390 mln tg qarajat ta bólingen. Osy másele boiynsha aýyl sharýashylyǵy basqarmasy tez arada sheshim qabyldaýy qajet. Sodan keiin, basqa óńirlerden mal azyǵyn tasymaldaýǵa temir jol tarifine arnaiy jeńildikter berý boiynsha Qazaqstan temir joly kompaniiasynyń sheshimi shyqty», - dedi ministrdiń mindetin atqarýshy.
Erbol Qarashókeevtiń aitýynsha, jalpy Qyzylorda oblysy boiynsha mal azyǵymen qamtamasyz etý úshin ishki múmkindikti tolyq paidalanyp jaǵdaidy sheshýge bolady.
«Aýdandar boiynsha, eldi mekenderde shóp shabý brigadalaryn qurý qajet. Osy eki kún ishinde barlyq aýdannyń jaǵdaimen tanysyp jedel sheshýdi qajet etetin máselelerdi saralaityn bolamyz», - dedi Aýyl sharýashylyǵy ministriniń mindetin atqarýshy.
Taǵy bir aita ketetin jait, Aýyl sharýashylyǵy ministrligi men «Báiterek» holdingi birlesip qosymsha mal azyǵyn daiyndaityn tehnika satyp alýdy qarjylandyrý jáne sýarmaly jerdi igerýge qajet qurylǵylardy satyp alýǵa nesie berý máselesin de qarastyratyn bolady. Issapar barysynda, ministrdiń mindetin atqarýshy Jalaǵash, Syrdariia, Shieli jáne Jańaqorǵan aýdandaryn aralap, aýyl sharýashylyǵy taýaryn óndirýshilermen kezdesti.
