Foto: uaqyt.info
Qarasai aýdanynyń ákimi Jasulan Estenov jelide daý týdyrǵan Almaty oblysyndaǵy mektepke qatysty pikir bildirdi. Ákimniń aitýynsha, ǵimarat memleket menshigine qaitarylady, - dep habarlaidy "Ult aqparat".
"Áleýmettik jelilerde talqylanyp jatqan Shalqar aýylyndaǵy M.Lomonosov atyndaǵy mekteptiń eski ǵimaraty 2018 jyly 15 224 000 teńgege satylǵan. Bul ǵimaratty memlekettiń quzyryna qaitarý úshin meniń tapsyrmama sáikes, biyl 9 naýryzda Almaty oblysynyń mamandandyrylǵan aýdanaralyq ákimshilik sotyna talap aryz joldandy. Qosymsha Qarasai aýdandyq prokýratýrasy tarapynan Shalqar orta mektebiniń eski ǵimaraty boiynsha qaýlylardyń kúshin joiýǵa talap aryz berildi. Biyl 25 mamyrda jáne 2 maýsymda sot otyrystary ótkizildi.
Aitaiyn degenim, qurmetti aýdan turǵyndary, bul jumysty biz úsh ai buryn bastap qolǵa alǵanbyz. Zańǵa sáikes, memleketke qaitaryp, el igiligine paidalanamyz" - dep jazdy ol Instagram-daǵy paraqshasynda.
Eske salaiyq, buǵan deiin Amanat partiiasy fraktsiiasynyń depýtaty Maqsat Tolyqbai Almaty oblysynda 15 million teńgege satylyp ketken mekteptiń máselesin kótergen edi.
