Aýdandyq deńgeidegi qala men kenttiń, aýyldar men aýyldyq okrgýterdiń sailaýyna aýdan ákimderi de kandidat usynýy múmkin, dep habarlaidy "Ult aqparat".
Májilistiń Zańnama jáne sot-quqyqtyq reforma komitetiniń tóraǵasy Qanat Mýsin «Qazaqstan Respýblikasyndaǵy sailaý týraly» Konstitýtsiialyq zańyna engiziletin ózgertýler men túzetýlerdy talqylaý barysynda osyndai málimet aitty.
«Men nazarlaryńyzdy mynaǵan aýdarǵym keledi. Aýdandyq mańyzdaǵy qalalardyń, kentter men aýyldardyń, aýyldyq okrýgterdiń ákimderin sailaý qazirgi tańda janama sailaý jolymen taǵaiyndalady. Iaǵni, olardy aýdan ákimi usynyp, máslihattar sailaidy. Al búgin tanystyrylyp otyrǵan zań jobasy boiynsha atalǵan laýazymdy tulǵalar halyqtyń tikelei daýys berýi arqyly sailanady. Bul sailaýdyń paradigmasyn aitarlyqtai ózgertedi», - degen Májilis ókili jańa ózgeris aýdan ákimderiniń úmitker usyný quqyǵyn tolyqtai shektemeitinin eskertti.
«Bul jerde taǵy eskeretin dúnie, atalǵan deńgeidegi ákimderdiń laýazymyna úmitkerlerdi aýdan ákimi usyný júiesi saqtalady. Biraq bul múmkindik laýazymdy orynǵa eshkim ózin-ózi usynbai qalsa jáne saiasi partiialar eshbir kandidat usynbasa ǵana qoldanylady. Muny rezervtik nusqa deýge de bolady», - dedi komitet tóraǵasy.
Buǵan deiin habarlaǵanymyzdai, Ulttyq ekonomika ministrligi ázirlegen zań jobasynda saiasi partiialardyń Májilis sailaýyna tirkeýden ótý shegin 5 paiyzǵa túsirý kózdelgen.
Sondai-aq, Ulttyq ekonomika ministrligi Májiliske «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» ilespe zań jobasyn tanystyrdy.
