Sońǵy kúnderi aýa raiynyń qolaisyzdyǵy saldarynan elimizdiń 8 oblysynda 289 eldimeken elektr jaryǵynsyz qaldy. Bul týraly QR Tótenshe jaǵdailar ministri Iýrii Ilin málim etti, dep habarlaidy QazAqparat.
«Biyl 29-30 naýryz kúnderi respýblikanyń 7 oblysy men 2 qalasynda qatty jeldiń saldarynan birneshe nysan shatyrynyń ushýy (297 jaǵdai) tirkeldi. Olardyń qatarynda bilim berý, densaýlyq saqtaý, turǵyn úiler, jergilikti bilik jáne quqyq qorǵaý organdary men taǵy basqa nysandar bar. Tótenshe jaǵdai saldarynan 8 adam, onyń ishinde 3 bala zardap shekti. Olardyń 4-i aýrýhanaǵa jatqyzylyp, qalǵany tekserýden soń úilerine jiberildi», - dedi Iýrii Ilin OKQ-de ótken brifingte.
Ministrdiń aitýynsha, qolaisyz aýa raiynyń saldarynan birneshe óńir turǵyndary ýaqytsha qiyndyqqa tap boldy.
«8 oblystyń 289 eldimekeninde aýa raiy qolaisyzdyǵynan bolǵan apat saldarynan elektr jaryǵy óship qaldy. Barlyǵy 110 387 abonent elektr jaryǵynsyz qaldy. Atap aitqanda Aqmola oblysy– 87, Qaraǵandy oblysy– 25, Almaty oblysy – 83, Atyraý oblysy – 10, Pavlodar oblysy– 70, SQO – 12, Aqtóbe oblysy – 1 jáne Jambyl oblysy – 1. Búgin saǵat 11.00-degi jaǵdai boiynsha 275 eldimekende elektr jaryǵy qalpyna keltirildi. Degenmen 3 oblystaǵy 14 eldimekende 12 709 abonent áli de bolsa elektr jelisine qosylmaǵan», - deidi ol.
