Atyraýlyqtar qaptaǵan masanyń videolaryn áleýmettik jelilerge júktep, sheneýnikterden kómek suraýda. Jergilikti halyqtyń aitýynsha, masa ásirese kóktemgi tasqyn sýdan keiin kóbeigen.
"Tańerteń júgirýge shyǵyp edim, mynaý degen Atyraýdyń masasy. Atyraýǵa dári-dármek bólinbeidi. Sý kelgeli mynany qarasańyzdarshy. Ne zat mynaý? Qazir munyń bárin Tik-Tokqa, Instagramǵa salamyn", - deidi atyraýlyq turǵyn videony júktei otyra.
31-arnanyń "Informbiýro" baǵdarlamasynyń habarlaýynsha, Atyraý ákimdigi jándikterdi ýlaý jumystary biyl tym kesh bastaǵan.
Jalpy masamen kúres jumystary naýryz aiynda bastalýy tiis edi. Alaida ákimdiktegiler arnaiy qansorǵyshtarǵa dári shashatyn kompaniiany áli tappaǵan. Sheneýnikter halyqtyń shaǵymy kóbeigen soń demeýshilerdi tartýǵa májbúr boldyq dep otyr.
"Maýsym aiynyń on úshinde qorytyndysy kútilýde. Jeńimpaz mekeme qandai mekeme bolsa, sol mekemege barlyq jumys júkteledi. Jáne bekitilgen kestemiz bar, ýlaý jumystary josparymyzda tur", - dedi jýrnalisterge Atyraý qalalyq turǵyn úi-kommýnaldyq sharýashylyq sektory bóliminiń meńgerýshisi Temirlan Áýbákirov.
Qala ákimdigi biýdjetten masany ýlaý jumystaryna byltyrǵydan eki ese kóp qarjy, iaǵni júz million teńge bólýdi josparlaǵan. Aldymen kópqabatty úilerdiń jertóleleri men Jaiyqtyń jaǵasy, sosyn saiabaqtar dezinfektsiialanbaq.
