Búgin Atyraý oblysyna Reseidiń Astrahan oblysynan dárigerler kelip, gýmanitarlyq júk jetkizildi, dep habarlaidy "Ult aqparat".
Óńirlik kommýnikatsiialar qyzmetiniń málimetinshe, Atyraýǵa búgin, 16 shildede Astrahannan bes meditsina qyzmetkeri keldi. Oblys ákimi Mahambet Dosmuhambetov reseilik dárigerlerge osyndai qiyn-qystaý kezeńde kómekke kelgeni úshin rizashylyǵyn bildirdi.
«Sizderge jáne Astrahan oblysynyń gýbernatory Igor Babýshkinge erekshe alǵys aitqym keledi. Qazirgi ýaqytta bizdiń dárigerlerimiz aldyńǵy shepte aianbai eńbek etýde. Degenmen, birazy qaýipti indetti juqtyrdy, qalǵany indetpen kúresý ústinde. Atqaratyn jumys kóp. Bizge sizderdiń tájiribe, bilimderińiz ben bilikterińiz qajet. Sondyqtan búginnen bastap kirisetin jumystaryńyzǵa sáttilik tileimin», - dedi Atyraý oblysynyń ákimi Mahambet Dosmuhambetov.
Kezdesýde astrahandyq dárigerlerdiń juqpaly aýrýlarǵa arnalǵan arnaiy blokta tikelei KVI juqtyrǵan naýqastarmen jumys isteitindigi, sondyqtan olardyń áriptesterine keńes berýmen shektelmei, infektsiia juqtyrǵandardy emdeýge tikelei qatysatyny, sondai-aq, «qyzyl aimaqqa» kiretindigi aityldy. Oblystyq densaýlyq saqtaý basqarmasynyń basshylyǵy reseilik dárigerler oblystyq kardiologiialyq ortalyq pen infektsiialyq statsionarda jumys isteitinin, qajet bolsa kei dárigerlerdi aýdandarǵa jiberetinin aitty.
«Bizdi óte jyly qabyldaǵandaryńyzǵa raqmet. Tolyqqandy jumys jasaýymyz úshin barlyq jaǵdai jasalǵan. Endi biz áriptesterimizge koronavirýspen kúreste kómektesý úshin bar kúshimizdi salýǵa tyrysamyz. Qoldan kelgenniń bárin jasaimyz», - dedi astrahandyq dáriger Anna Chepel.
