Atyraýda jeke úidegi jarylystan keiin aýrýhanaǵa túsken úsh naýqastyń ekeýi kóz jumdy, dep habarlaidy QazAqparat.
Buǵan deiin Atyraýda jeke úide jylý qazandyǵy jarylǵanyn jazǵan edik.
Jarylys 10 qarashada túngi saǵat 1:24-te Atyraý qalasynyń Balaýsa shaǵyn aýdanyndaǵy jeke úide bolǵan.
Tótenshe jaǵdai departamenti baspasóz qyzmetiniń málimetinshe, jarylys saldarynan jalpy kólemi 120 sharshy metr bolatyn turǵyn úi otqa orandy. Turǵyn úidiń tóbe jabyndysy men bólmeleri tolyqtai órtenip ketti. Órt saǵat 2:15-te oqshaýlanyp, saǵat 2:40-ta óshirilgen edi.
Keiin oblystyq densaýlyq saqtaý basqarmasynyń baspasóz qyzmeti aýrýhanaǵa túsken úsh adamnyń jaǵdaiy aýyr ekenin habarlady.
Naýqastyń ekeýi – 19 jastaǵy eki jigit jansaqtaý bólimshesine túsken. Al, úshinshisi – 22 jastaǵy boijetken.
Jansaqtaý bólimshesindegi naýqastyń biriniń denesin 90%, ekinshisinde 85-90% kúiik shalǵan. Ekeýiniń de jaǵdaiy óte aýyr. Naýqastyń ekeýi de jasandy tynys alý apparatyna qosylǵan. Al, 1999 jylǵy boijetken 25-30% kúiikpen neirotravmatolgiia bólimshesine tústi. Onyń da jaǵdaiy aýyr.
«Oblystyq aýrýhananyń jansaqtaý bóliminiń dárigerleri II jáne III dárejeli kúiikpen túsken 19 jastaǵy eki jigitke meditsinalyq em-dom sharalaryn júrgizdi. Alaida, keshe, 14 qarashada denesiniń 85-90%-yn kúiik shalǵan 2002 jylǵy jigittiń biri qaitys boldy. Al, búgin, 15 qarashada 90-95% kúiik alǵan ekinshi naýqas – 19 jastaǵy jigit kóz jumdy» -dep málim etti basqarmanyń baspasóz qyzmetinen.
