Foto: Viktor Fediýnin / Kazinform
Ótken aptada Atyraýdaǵy mal satatyn bazarda ólgen siyrdan sibir jarasy anyqtalyp, qasaphanada jumys isteitin bir adam aýrýhanaǵa túsken edi. Aýrýhanada jatqan adamnyń sibir jarasyn juqtyrǵany rastaldy, dep habarlaidy «Ult aqparat» Kazinform-ǵa silteme jasap.
Atyraý oblysy ákiminiń baspasóz hatshysy Rýslan Jumaǵazievtiń aitýynsha, «Asyl-Agro» sharýa qojalyǵynyń mal soiý pýnkti aýmaǵynda 20 qarashada karantin engizildi. Oǵan ólgen siyrdan sibir jarasynyń anyqtalǵany sebep bolǵan.
«Zerthanalyq taldaý nátijeleri boiynsha mal soiý pýnktiniń bir jumysshysynan teri sibir jarasy diagnozy rastaldy. Naýqas aýrýhanada jatyr. Oǵan bekitilgen meditsinalyq hattamaǵa sáikes emdeý júrgizý qolǵa alyndy. Qazir onyń jaǵdaiy turaqty. Ózge adamdardan aýrýdyń belgileri baiqalmady», — dep habarlady Rýslan Jumaǵaziev.
Onyń aitýyna qaraǵanda, infektsiia oshaǵynda sanitarlyq jáne veterinariialyq normalarǵa sáikes jumystardy júrgizý jalǵasyp jatyr.
«Veterinariialyq baqylaý mamandary karantindik aýmaqta turǵan maldyń barlyǵyn tolyq vaktsinatsiialaýdy aiaqtady. Bul aýmaqta dezinfektsiialaý jumystary júrgizilip jatyr. Sibir jarasy aýrýynyń anyqtalýyna bailanysty Atyraý oblysyna iri qara mal ákelýdi baqylaý úshin tórt politsiia jáne veterinarlyq baqylaý beketi ornatyldy. Mal ákelýshilerden egý júrgizilgenin rastaityn qujattar tekserilip, maldyń jaǵdaiy tekserilip, termometriia júrgizilýde. Sanitarlyq qaýipsizdik maqsatynda osyndai sharalar Atyraý qalasyndaǵy mal soiý pýnktterinde de uiymdastyryldy. Veterinariialyq qujattarsyz maldy tasymaldaýǵa jáne soiýǵa qatań tyiym salyndy», — dep málim etti Rýslan Jumaǵaziev.
Eske sala ketelik, budan buryn Atyraýdaǵy mal bazarynda ólgen siyrdan sibir jarasy anyqtalǵanyn jazǵan edik.
Keiin mal bazarynda jumys isteitin bir adam aýrýhanaǵa túskenin habarlaǵan bolatynbyz.
