Atyraý oblysynda perzenthana qyzmetkeri sábidi satpaq bolǵany úshin sottaldy, - dep habarlaidy kaz.tengrinews.kz tilshisi oblystyq sottyń baspasóz qyzmetine silteme jasap.
Atyraý oblysyndaǵy perinataldyq ortalyqtyń qyzmetkeri paidakúnemdilik maqsatta biologiialyq ata-analary bas tartqan jańa týǵan sábidi satpaq bolǵan. Ol satyp alýshylarmen sábidi satý úshin qoiylǵan sharttardy aitý maqsatynda kezdesý belgilep qoiǵan.
Meditsinalyq qyzmetker satyp alýshylardan bes myń dollar suraǵan. Aldyn ala tólem retinde aqshanyń jartysyn alǵan. "2016 jyldyń 19 maýsymynda shamamen saǵat 13.21-de sottalýshy áiel qalǵan 2 500 dollar aqshany alyp, sábidi solai satyp jibergen. Sodan politsiia qyzmetkerleriniń tintý jumystary barysynda satyp alýshylardyń bergen 2 500 dollar kólemindegi aqsha tárkilendi", - dep habarlady Atyraý oblystyq sotyndaǵylar.
Sottyń úkimimen perinataldyq ortalyqtyń qyzmetkeri QR Qylmystyq kodeksiniń 135-baby boiynsha ("Kámeletke tolmaǵandar saýdasy") aiypty dep tanyldy. Sottalýshy áieldiń múlki tárkilenip, bes jylǵa bas bostandyǵynan aiyryldy. Ol jazasyn jalpy rejimdegi túzetý koloniiasynda óteitin bolady.
