Atyraýda dárigerlerge dórekilik kórsetken, vaktsinanyń jaǵymsyz áseri týraly jala japqan sheteldikke aiyppul salyndy, dep habarlaidy QazAqparat.
Buǵan deiin Atyraýda sheteldik dárigerlerge dórekilik kórsetkeni anyqtalyp, № 3 qalalyq emhananyń ákimshiligi vaktsinalaý beketiniń medqyzmetkerlerin qorlaǵany úshin, sondai-aq, vaktsinanyń jaǵymsyz áseri týraly jala japqany úshin politsiiaǵa aryz jazǵan edi.
Atyraýda mamandandyrylǵan ákimshilik sotynda «Dina» bazarynda júk tieýshi bolyp jumys isteitin Ózbekstan Respýblikasynyń 24 jastaǵy azamatyna qatysty is qaraldy.
«Sot isine sottalýshy men dáriger qatysty. Sottalýshy óz kinásin moiyndap, dárigerden keshirim surady. Sot Ózbekstan Respýblikasynyń azamatyn QR Ákimshilik quqyqbuzýshylyq týraly kodeksiniń 434-babymen (usaq buzaqylyq) kináli dep tanyp, 10 210 teńge aiyppul saldy. Sheteldikke jumys berýshi – saýda dúńgirsheginiń iesine de aiyppul salyndy», - dep habarlady oblystyq sottyń baspasóz qyzmeti.
