Atyraýda tuzaqqa túsken jabaiy dala mysyǵy tabiǵatqa jiberildi, dep habarlaidy QazAqparat.
Atyraý oblystyq orman sharýashylyǵy jáne janýarlar dúniesi aýmaqtyq inspektsiiasynyń bas mamany Nurlan Imanǵalievtiń aitýynsha, jabaiy dala mysyǵy sharýa qojalyǵynyń tuzaǵyna túsken.
«Ótken demalys kúnderi Atyraý qalasynyń mańyndaǵy sharýa qojalyǵynyń aýmaǵynda jabaiy dala mysyǵy usaq jandyqtar men qustardy jaraqattaǵan. Sol kezde jabaiy mysyq tuzaqqa túsip qalǵan. Biraq sharýa qojalyǵynyń jetekshisi tosyn áreketke barmai, volonterlerge júgingen. Eriktiler bul jóninde oblystyq aýmaqtyq orman sharýashylyǵy jáne janýarlar dúniesi inspektsiiasyna habarlady. Bizdiń inspektsiia inspektorlary eriktilermen birge jabaiy mysyqty «Aq Jaiyq» memlekettik tabiǵi rezervatynyń aýmaǵyna ákelip, tabiǵi mekendeý ortasyna jiberdi», - deidi Nurlan Imanǵaliev.
