Atyraýda «Teńizshevroil» birlesken kásiporny koronavirýspen kúres sharalaryna 1,3 mlrd teńge bóldi. Bul týraly kompaniianyń Úkimetpen jáne qoǵammen bailanys bóliminiń bas menedjeri Rzabek Artyǵaliev málim etti, dep habarlaidy "Ult aqparat".
Onyń aitýynsha, Teńiz ken ornynda meditsinalyq qural-jabdyqtarmen qamtylǵan 300 oryndyq oqshaýlaý orny daiyndalǵan. Qazir kompaniia qyzmetkerleri dene qyzýy ólshengennen keiin ǵana jumys ornyna jiberiledi. Al, keńse qyzmetkerleriniń 70% qashyqtan jumys isteý rejimine kóshken. Olardyń jalaqysy saqtalady.
«Kompaniianyń esebinen bólingen 1,3 milliard teńgege meditsinalyq qurylǵylar men jabdyqtar satyp alynyp, Atyraý oblysynyń densaýlyq saqtaý mekemelerine beriledi. Qazirdiń ózinde qurylǵylardyń bir bóligi ákelindi. Qalǵany jaqynda jetkiziledi. Sondai-aq, «Teńizshevroildyń» bastamasymen «Atyraý-Astrahan» tas joly boiyndaǵy oqshaýlaý beketi jabdyqtaldy», -dedi Rzabek Artyǵaliev.
