Atyraý oblysynda Ózbekstan azamaty blokbeketti ainalyp ótpek bolǵan, dep habarlaidy "Ult aqparat".
«Atyraýda 2 sáýirde túngi 00:30 shamasynda Ózbekstan Respýblikasynyń 1986 jyly týǵan azamaty «Almaly-Taldykól» selolary arasyndaǵy qara joldan Inder aýdany baǵytyna jaiaý ótpekshi bolǵan. Ustalǵan azamatqa qatysty QR Ákimshilik quqyqbuzýshylyq týraly Kodeksiniń 476-babyna sáikes hattama toltyryldy. Sot qaýlysymen shetel azamaty bes táýlik qamaldy», - dep habarlady oblystyq politsiia departamentiniń baspasóz qyzmeti.
Sondai-aq, keshe tańerteńgi saǵat 08.20-da Almaly blokbeketinen tys ainalma qara jolda «Toyota Camry» kóliginiń júrgizýshisi toqtatylǵan. Politsiia qyzmetkerleri tótenshe jaǵdai rejimin buzǵan 1987 jylǵy júrgizýshige qatysty hattama toltyrǵan. Bul azamat ta Atyraý qalasynyń mamandandyrylǵan ákimshilik sotymen qaýlysymen 3 táýlikke qamaýǵa alyndy.
Budan basqa atalǵan jolda jáne Qaraózek blokbeketi mańaiyndaǵy qara jol boiynan toqtatylǵan tórt kólik júrgizýshisine de QR Ákimshilik quqyqbuzýshylyq týraly Kodekstiń 476-babymen toltyrylǵan hattamalar sotqa joldandy.
Eske sala ketelik, Atyraý qalasynyń ainalasyna tórt blokbeket ornatylyp, 2 sáýirde saǵat túngi 00.00-den bastap qalaǵa avtokólikter men adamdardyń kirýi jáne shyǵýyna shekteý engizildi.
