Atyraýda oblys ákimi orynbasarynyń qylmystyq isi sotta qaralyp jatyr, dep habarlaidy QazAqparat.
Budan buryn oblys ákiminiń baspasóz qyzmetinen málim etkendei, Atyraý oblysy ákiminiń orynbasary Qairat Nurlybaev prokýrordyń 2021 jylǵy 13 shildedegi qaýlysymen qylmystyq is boiynsha kúdikti retinde tanylǵan.
«Oblys ákiminiń orynbasary 83,7 mln teńge kólemindegi investitsiialyq sýbsidiiany «Buiyrǵyn» aýylsharýashylyq óndiristik kooperativine zańsyz tóleý faktisi boiynsha biýdjet qarajatyn ysyrap etti degen kúdikke ilinip otyr. Qairat Nurlybaev oblystyq aýyl sharýashylyǵy basqarmasyn basqaryp turǵan kezde (atalǵan laýazymǵa ol 2019 jylǵy 5 maýsymda taǵaiyndalǵan), iaǵni 2019 jyldyń 26 maýsymy men 4 jeltoqsany aralyǵynda investitsiialyq sýbsidiia kelisimshartyn jasaǵan jáne investitsiialyq sýbsidiiany tólegen. «Buiyrǵyn» kooperativi 83,7 mln teńge kólemindegi boryshty tolyqtai ornyna keltirdi», - dep habarlady ákimdiktiń baspasóz qyzmeti.
Byltyrǵy qańtardan beri oblys ákiminiń orynbasary laýazymyn atqaratyn Qairat Nurlybaevqa qatysty qylmystyq isti qaraý Atyraý qalalyq №2 sotta jalǵasyp jatyr.
«Basty sot talqylaýy byltyrǵy 23 jeltoqsanda bastaldy. Sodan beri 5 ret sot otyrysy ótti. Qylmystyq is QR Qylmystyq kodekstiń 189-babynyń 4-bóliginiń 2-tarmaǵymen qaralyp jatyr», - dep málim etti oblystyq sottyń baspasóz qyzmetinen.
