Atyraýlyq dárigerler muz astyna túsip ketip, uzaq ýaqyt boiy sýdyń ishinde bolǵan úsh jasóspirimniń jaǵdaiy týraly aitty, dep habarlaidy QazAqparat tilshisi.
«Politseiler qutqaryp qalǵan jasóspirimder shuǵyl túrde oblystyq balalar aýrýhanasyna jetkizildi. Olardyń jaǵdaiy aýyr bolǵan joq, degenmen, alańdaýshylyq boldy. Balalar muzdai sýdyń astynda qalyp qoiǵan, salqyn tigen. Oǵan qosa, eseńgirep qalǵan. Pnevmoniiaǵa shaldyǵýy ábden múmkin edi. Biraq, qazir barlyǵy jaqsy. Aǵzalary jas bolǵandyqtan, saýyǵyp kele jatyr. Ómirlerine eshqandai qaýip joq», - dedi oblystyq balalar aýrýhanasynyń dárigeri Múbárak Sársenov.
Eske salaiyq, qaiǵyly oqiǵa 4 qańtar kúni keshki ýaqytta boldy. Tórt jasóspirim Tomarly kenti mańynda Jaiyq ózeniniń ústinde oinap júrip, muz astyna túsip ketken. Bireýi kóz jumyp, úsheýi aman qaldy. Óz betimen sýdan shyǵa alǵan balalardyń biri oqiǵa týraly habar bergen.
«Kapitan Qýandyq Súiindikov pen leitenant Timýr Balmaǵanbetov habar túskennen keiin kómek kórsetýge barǵan. Olar 2004 jáne 2005 jylǵy balalardy jaǵaǵa shyǵardy. Politsiia qyzmetkerleriniń biriniń kiimindegi kameradan politseiler ózen ortasynan estilip turǵan balalardyń daýysyna qarai bara jatqanyn kórýge bolady. Qutqarý kezinde balalardyń aiaq-qolynyń jany ketip qalǵan. Jasóspirimderdiń biri: «Mama, seni jaqsy kóremin» dep qaljyrai aityp jatty. Ókinishke orai, politseiler bir balany qutqara almady – ol tártip saqshylary kelgenge deiin sý astyna batyp ketti», - dedi óńirlik Politsiia departamentiniń baspasóz qyzmetinen.
Qutqarylǵan úsh jasóspirim oblystyq balalar aýrýhanasyna jetkizildi. 2004 jylǵy balanyń denesi tabyldy, ony súńgýirler sýdan alyp shyqty.
