Atyraý oblysyndaǵy otandyq kásiporyn óndiretin kómirsýtegi shikizatynyń qory 86,2 million tonnaǵa jetti, dep habarlaidy "Ult aqparat".
«Embimunaigaz» AQ baspasóz qyzmetiniń habarlaýynsha, ken oryndarynda qosymsha barlaý esebinen kómirsýtegi shikizatynyń qory eselendi. Bul Memleket basshysy Qasym-Jomart Toqaevtyń geologiialyq barlaý jumystaryn kúsheitýge qatysty tapsyrmasyna sáikes qolǵa alynǵan bolatyn. Qazir «Embimunaigaz» ieligindegi ken oryndarynan óndiriletin munai qory 86,2 million tonnaǵa jetti. Al, ótken jyly mundaǵy qor kólemi 74,3 million tonnany quraǵan edi.
«Byltyr QR Paidaly qazbalar korlary jónindegi memlekettik komissiiasy qoldanystaǵy S.Nurjanov, Kenbai (Shyǵys Moldabek ýchaskesi), J.Dosmuhambetov, Botaqan, sondai-aq qaita ashylǵan Batys Qarasor (1,4 mln tn) ken oryndarynda 14,8 mln tonna kólemindegi kómirsýtegi shikizaty qoryn balansqa alyp, bekitti. Qor ósimine baiyrǵy ken oryndaryn igerýge jańa ádister men tehnologiialardy qoldana otyryp, belsendi barlaý jumystaryn júrgizý nátijesinde qol jetti», - dep habarlady «Embimunaigaz» AQ-nyń baspasóz qyzmeti.
Sondai-aq, byltyr Taisoiǵan blogynyń 5 600 sharshy shaqyrym aýmaǵyna 3D MOGT seismobarlaý júrgizilgen. Endi seismobarlaý derekterin óńdeý arqyly barlaý, burǵylaý jumystary júrgiziletin qurylymdardy daiyndaý kózdelip otyr.
