Qazaqstannyń halyq ártisi Maqpal Júnisova áleýmettik jelidegi paraqshasynda marqum jary Zamanbek Nurqadilovti eske alyp, kópshilikti tebirentken jazba jariialady, dep habarlaidy ult.kz.

Ánshi otbasylyq muraǵatyndaǵy estelik beinematerialmen bólisip, ótken kúnderge degen saǵynyshyn jetkizdi. Óner iesi qyzy Mereidiń shildehanasynda túsirilgen beinejazbany kórgen saiyn marqum jary áli de janynda júrgendei sezinetinin aitty.

“Osyndai estelikterdi qarasam, Zákeń janymda júrgendei áserde bolamyn. Mereijannyń shildehanasynan estelik. Topyraǵyńyz torqa bolsyn, Záke”, – dep jazdy ánshi.

Maqpal Júnisovanyń bul jazbasynan ómirlik serigine degen saǵynyshy men birge ótkizgen baqytty sátterin erekshe qadirleitinin ańǵarýǵa bolady.

Aita keteiik, Maqpal Júnisova Ulttyq gospitaldiń qyzmetinen bas tartpaq. 

Maqpal Júnisova kim?

Maqpal Júnisova – qazaq estradasynyń tanymal ánshisi, Qazaqstannyń halyq ártisi jáne Memlekettik syilyqtyń laýreaty. Ol 1964 jyly 11 qańtarda Qaraǵandy oblysynyń Terekti aýylynda dúniege kelgen. Bala kezinen ónerge qyzyǵýshylyq tanytyp, Ahmet Jubanov atyndaǵy mýzykalyq mektep-internatta bilim alǵan. Keiin Shymkent mádeniet institýtyn támamdaǵan. Shyǵarmashylyq jolyn “Gúlder” ansamblinde halyq ánderin oryndaýdan bastaǵan. Keiin “Qazaqkontsert” birlestigi janynan “Nazerke” ansamblin uiymdastyrǵan. 1994 jyly Qazaqstannyń halyq ártisi ataǵyn alyp, 1999 jyly Memlekettik syilyqtyń laýreaty atandy. Onyń oryndaýyndaǵy “Ǵashyq júrek”, “Qyz ǵumyr”, “Fariza qyz” jáne “Qoshtasý” ánderi tyńdarmanǵa keńinen tanymal. Óner iesi búginde de shyǵarmashylyǵyn jalǵastyryp keledi.

Zamanbek Nurqadilov kim?

Zamanbek Nurqadilov – Qazaqstannyń memleket jáne qoǵam qairatkeri, saiasatker. Ol 1944 jyly 15 qańtarda Almaty oblysynyń Kegen aýdanynda dúniege kelgen. Eńbek jolyn qurylys salasynda bastap, keiin memlekettik basqarý qyzmetine aýysqan. 1985 jyly Almaty qalalyq atqarý komitetiniń tóraǵasy qyzmetine taǵaiyndalǵan. Táýelsizdik alǵannan keiin Almaty qalasynyń alǵashqy basshylarynyń biri boldy. 1997–2001 jyldary Almaty oblysynyń ákimi qyzmetin atqardy. Keiin Qazaqstannyń Tótenshe jaǵdailar agenttigin basqardy. 2004 jyldan bastap sol kezdegi bilikti ashyq synap, oppozitsiialyq qyzmetke aralasty. Zamanbek Nurqadilov 2005 jylǵy qarashada Almatydaǵy úiinde oq jaraqattarymen óli kúiinde tabyldy. Resmi tergeý onyń ólimin sýitsid dep baǵalaǵanymen, bul qorytyndy qoǵamda kúmán men pikirtalas týdyrdy. Ol ánshi Maqpal Júnisovanyń jary bolǵan. Ekeýi Merei esimdi qyz tárbielegen.