Atyraýda koronavirýs infektsiiasy qala turǵyndarynan kóbirek anyqtalyp jatyr, – dep habarlaidy óńirlik kommýnikatsiialar qyzmetinen.
Atap aitqanda, ótken táýlikte qaýipti indettiń belgisi 23 turǵynnan tabylǵan.
«Naýqastardyń arasynda Atyraý qalasynyń 21 turǵyny bar. Onyń 12-si – er, toǵyzy – áiel. Skriningten ótý jáne JRVI klinikalyq simptomymen meditsinalyq kómekke júginý kezinde naýqastardan koronavirýs infektsiiasynyń belgisi tabylǵan. Sondai-aq, Jylyoi aýdanynyń 2 turǵyny da indet juqtyrǵan» delingen habarlamada.
Qazir indetti juqtyrǵandar infektsiialyq aýrýhanaǵa jatqyzylyp, bekitilgen hattamaǵa sáikes em qabyldap jatyr. Al, olarmen bailanysta bolǵandar dárigerler baqylaýyna alynyp, indet oshaqtaryna dezinfektsiialyq jumystar júrgizilýde.
Atyraý oblysynda koronavirýs infektsiiasyna shaldyqqandar sany 1640 adamǵa jetti. Jazylyp shyqqandar –1376 adam.
Eske sala ketelik, buǵan deiin Atyraý oblystyq aýrýhanasynda 400 oryndyq infektsiialyq statsionar ashylatynyn jazǵan edik.
