Táýelsizdik kúni qarsańynda Atyraýda Qazaqstan Respýblikasynyń halyq jazýshysy, Memlekettik syilyqtyń laýreaty, aitýly aqyn Hamit Erǵalievke eskertkish ornatyldy, dep habarlaidy "Ult aqparat".
Saltanatty sharany ashqan Atyraý oblysy ákimi Nurlan Noǵaev eskertkishtiń ornalasqan jeriniń ózi «Jaiyqtyń jaǵasy – erekshe ekenin atap ótti.
«Hamit aǵamyzdyń ózi jyrlap ótken Aq Jaiyqtyń boiynda, ózenge kóz tastaǵan záýlim eskertkishi boi kóterdi. Sońǵy kúnine deiin óziniń elin, jerin jyrlap, jazyp, tasqa tańba basqandai etip ketti. Bir sózben aitqanda, óz eline bir adamdai eńbek etti. Mine, myna alańǵa aldaǵy ýaqytta jinalatyn atyraýlyqtar men qala qonaqtary, osy eskertkishke kóz tastap, Hamit aǵamyzdyń óleńderimen tanysyp, óz boilaryndaǵy ultqa, elge, jerge degen sezimderin nyǵaitady degen senimdemin», - dedi Nurlan Noǵaev.
Eskertkish avtory – músinshi Nurǵalym Isabaevtyń aitýynsha, biiktigi jeti metr bolatyn músin qoladan quiylǵan. Aqynnyń bar bolmysyn berý úshin, sheber bir jyl boiy tynymsyz eńbek etken.
Eskertkishtiń ashylý saltanatyna Hamit Erǵalievtiń ul-qyzy – Murat Erǵaliev pen Gúljan Erǵalieva, Qazaqstan Jazýshylar odaǵy basqarma tóraǵasynyń orynbasary Mereke Qulkenov jáne Atyraý oblysynyń qoǵam jáne mádeniet qairatkerleri qatysty.
Arqaly aqyn Hamit Erǵaliev 1916 jyly Isatai aýdanynyń Novobogat aýylynda týǵan. Qazir, bul aýyl aqynnyń atymen atalady.
1940 jyldan ásker qatarynda kavaleriia bóliminde eskadron komandiri bolǵan. Ekinshi dúniejúzilik soǵys kezinde Býdapesht mańyndaǵy urystardyń birinde aýyr jaralanyp, 1945 jyly elge qaitarylady.
II deńgeili UOS ordenimen, eki márte Eńbek Qyzyl tý ordenimen, Qurmet belgisi men Halyqtar dostyǵy ordenderimen jáne kóptegen medaldarmen marapattalǵan.
Alǵashqy óleńderi 1936 jyly basyldy.
Otyzdan astam kitaptyń avtory – Hamit Erǵaliev – qazaq ádebietinde ózindik aiqyn izin qaldyrdy. 1982 jyly «Altyn zeren» kitaby úshin Abai atyndaǵy Memlekettik syilyq tabystalsa, 1986 jyly – Qazaqstannyń halyq jazýshysy qurmetti ataǵy berildi.
