Atyraý oblysynda sheteldikterge tólengen jalaqynyń mólsheri 4,5 ese kóp bolǵany anyqtaldy, dep habarlaidy "Ult aqparat".
Atyraý oblystyq memlekettik eńbek inspektsiiasy basqarmasynyń basshysy Igilik Áýbákirovtiń aitýynsha, byltyr Bas Prokýratýranyń tapsyrmasymen 43 kompaniiaǵa tekserý júrgizilip, jalaqy aiyrmashylyǵy boiynsha 109 derek anyqtalǵan. Sondai-aq, sheteldik mamandar tarapynan ruqsat etilgen mindetin atqarýǵa sáikes emestigine bailanysty 167 derek belgili bolǵan.
«Tekserý nátijesimen 364 ákimshilik is toltyrylyp, 96 mln teńge aiyppul salyndy. Qazirge deiin memleket paidasyna 73 mln teńge óndirildi. Aiyppuldyń qalǵan bóligi óndirilý ústinde. Buǵan qosa, sheteldik mamandy shaqyrý úshin berilgen 212 ruqsat keri qaitaryldy. Osyǵan bailanysty 212 sheteldik Qazaqstan aýmaǵynan shyǵaryldy. Sondai-aq, sheteldik mamandardy shaqyrýǵa berilgen 50 ruqsat merzimi bitken soń uzartylmaidy», - dedi Igilik Áýbákirov.
Onyń málim etýinshe, qazaqstandyq mamandar men sheteldikter jalaqysynyń aiyrmasy da baiqalǵan. Máselen, «Sarens» kompaniiasynyń qazaqstandyq sýpervaizeri 750 myń teńge jalaqy alǵan. Al, dál osyndai jumysty atqarǵan sheteldik mamanǵa 3 mln 400 myń teńge tólengen. Aiyrma – 4,5 ese. Taǵy bir derek, qazastandyq injenerdiń jalaqysy 300 myń teńgeni qurasa, sheteldik injenerge 1 mln 300 myń teńge jalaqy eseptelgen.
«Zańdylyqty buzǵan kompaniialar ákimshilik jaýapkershilikke tartylyp, aiyppul salyndy. Bes kompaniia jalaqy kólemin bir deńgeige sáikestendirdi. Qalǵan kompaniialar sheteldik mamandar laýazymyn qysqartty. Qazir bul kompaniialarda sheteldik mamandar jumys jasamaidy», - dedi Atyraý oblystyq memlekettik eńbek inspektsiiasy basqarmasynyń basshysy Igilik Áýbákirov.
