Atyraýdaǵy emhananyń esepshotynan 70 mln teńge urlaǵandar sottaldy, dep habarlaidy "Ult aqparat".
Budan buryn Atyraýda emhananyń esepshotynan 70 mln teńge urlanǵany habarlanǵan edi.
Jaqynda atalǵan qylmystyq iske qatysty kúdiktilerge sot úkimi shyqty.
«2019 jyly 25 jeltoqsanda D.T. kásipkerlik qyzmetpen ainalysý maqsatynda Almaty oblysynyń Taldyqorǵan qalasynda «Lab service plus 1» jaýapkershiligi shekteýli seriktestigin tirkegen. Sodan keiin A.A. esimdi azamatpen jáne sotqa deiingi tergeý kezinde anyqtalmaǵan belgisiz tulǵalarmen aldyn ala sóz bailasý arqyly 2020 jylǵy 13 shildede Almaty qalasynda bankten shot ashyp, bankomattyq kartochka men onlain banking kiltin alǵan. Sol jyldyń 3 tamyzynda belgisiz tulǵalar saǵat 16:00-den 17:00-ge deiingi aralyqta №1 Atyraý qalalyq emhanasynyń qarjy-sharýashylyq qyzmetiniń aqparatyna zańsyz qol jetkizip, býhgalteriianyń qashyqtyqtan aqparattyq qol jetkizý júiesine ruqsatsyz kirgen. Onda emhana úshin joq tólemder jasap, №1 Atyraý qalalyq emhanasynyń esepshotynan «Lab service plus 1» JShS-tiń esepshotyna jáne sottalýshy D.T.-nyń jeke shotyna COVID-19 qarsy kúreske bólingen qarajat esebinen 70 000 000 teńge aqshany aýdarǵan. Keiin sońǵysy aqshany qolma-qol sheship alyp, №1 Atyraý qalalyq emhanasyna joǵaryda kórsetilgen somada múliktik ziian keltirgen»,-dep habarlady oblystyq sottyń baspasóz qyzmeti.
Atyraý qalasynyń №2 sotynyń úkimimen D.T. men A.A. QR Qylmystyq Kodeksiniń 188-babynyń 4-bóligi, 3-tarmaǵymen kináli dep tanyldy.
Sot qylmystyq quqyq buzýshylyqtyń sipaty men qoǵamǵa qaýiptilik dárejesin eskere otyryp, Qylmystyq Kodeksiniń 55-babynyń 2-bóligimen D.T-ǵa - 6 jyl 6 ai, A.A-ǵa - 5 jyl merzimge bas bostandyǵynan aiyrý jazasyn taǵaiyndady.
Sot úkimi zańdy kúshine engen joq.
