Densaýlyq saqtaý ministri Aleksei Tsoi óńirlerde dári-dármekti qymbatqa satatyn alypsatarlardyń áreketine qalai shekteý qoiylyp jatqanyn aityp berdi, dep habarlaidy QazAqparat.
«Búgingi kúni Qazaqstannyń barlyq óńirinde ákimdikter janynan monitoring toptary quryldy. Qoǵamdyq keńester men úkimettik emes uiymdar da dári-dármek baǵasyn baqylaý jumysyna belsene atsalysýda. Olardyń bári memleket bekitken shekti baǵany qadaǵalaidy. Baǵa kóterý jaǵdailary bar. Sonymen qatar bizge quqyq qorǵaý organdary da kóp kómek kórsetýde. IIM qazirgi tańda Qazaqstannyń barlyq óńirinde aýqymdy tekseristi bastady. Birneshe kúngi tekseristerde áleýmettik jelilerdegi dári-dármek pen maskalardyń spekýliantty saýdasyna basa mán berildi», - dedi ministr búgin OKQ-da ótken baspasóz máslihatynda.
Onyń aitýynsha dári-dármekti qymbatqa qaita satýdyń birneshe jaǵdaiy tirkelgen.
«Máselen, dárihanalardyń qyzmetkerleri medikamentterdi sóreden cheksiz satqan. Osynyń saldarynan azamattar negizsiz qymbat baǵaǵa dárini satyp alýǵa májbúr bolǵan. 6 shildede elordada quqyq qorǵaýshylar «Toiota» markaly kólikti ustady. Onyń bagajy medikamentterge toly bolǵan. Álgi azamat 1 million teńge paida taýyp, dári-dármekti qymbattata satpaq bolǵan. Avtokólikte 689 dáriniń qaptamasy bary anyqtaldy. Shymkentte tipti, bir áiel dárini óz úiinde otyryp satqan. Tekseris barysynda úiden ártúrli medikamentterdiń 229 túri (10459 qaptama) anyqtaldy. Osy dárilerdiń bári de JRVI-dy emdeýge arnalǵan dáriler. Mundai preparattar antisanitariialyq jaǵdaida saqtalǵan», - dedi ol.
Sol sekildi Jetisai qalasynda TsEF III preparatynyń 336 qaptamasyn bir adamǵa satý (400 myń teńgege) jaǵdaiy tirkelip otyr. Bul preparattar qaladaǵy dárihanalardyń birine satylmaq bolǵan.
«Atyraýda medikamentter tipti, kosmetologiialyq klinikada satylǵan. Quqyq qorǵaýshylar dáriniń osylaisha litsenziiasyz satylyp jatqanyn anyqtady. Zańsyz saýdany klinikanyń basshysy uiymdastyrǵan. Onymen qoimai, ol dári baǵasy resmi shekten birneshe ese kóp bolǵan. Máselen 5 myń teńgelik Ingavirin úsh ese qymbatqa, al Paratsetamol tipti, 10 ese artyq baǵamen qymbatqa satylǵan. Klinikadan 5 myń qaptama tárkilendi», - dedi ol.
