Atyraý oblysynda koronavirýspen kúresip jatqan dárigerlerge ústemeaqy tóleý úshin 959 million 997 myń teńge bólindi, - dep habarlaidy QazAqparat.
«Qazir «Áleýmettik meditsinalyq saqtandyrý qory» kommertsiialyq emes aktsionerlik qoǵamymen Atyraý oblysyna koronavirýs infektsiiasymen kúres júrgizetin meditsina uiymdarynyń qyzmetkerlerine jalaqyǵa qosymsha ústemeaqy tóleýge 959 million 997 myń teńge bólindi. Al, 9 sáýirden bastap qordyń Atyraý oblysy boiynsha filialymen meditsina uiymdaryna aldyn ala tólem júrgizildi. Onyń ishinde oblystyq jedel járdem stantsiiasyna 20 million teńge, oblystyq jáne aýdandyq aýrýhanalarǵa 268 million teńge aýdaryldy. Meditsina uiymdarynyń qyzmetkerleri tiisti ústemeaqylaryn aldy. Áleýmettik meditsinalyq saqtandyrý qory jaǵdaiǵa únemi jan-jaqty taldaý jasap otyr. Meditsinalyq uiymdardy qarjylandyrý toqtatylmaidy. Bul tiisti keste boiynsha júrgizile beredi» -deidi «Áleýmettik meditsinalyq saqtandyrý qory» Atyraý oblysy boiynsha filialynyń direktory Sábit Quralbek.
