Atyraýda arheologtar kóne kerýen sarai qaldyqtaryn tapty, dep habarlaidy QazAqparat.
Táýelsizdiktiń 30 jyldyǵyna orai Altyn Ordaǵa arnalǵan ǵylymi-praktikalyq konferentsiia aiasynda ekspeditsiia ótip, oǵan ǵalymdar men arheologtar qatysty.
Mahambet aýdanyndaǵy Saraishyq aýylynan 15 shaqyrym jerden «Saraishyq» memlekettik tarihi-mádeni qoryq-mýzeiiniń qyzmetkerleri biyl júrgizgen qazba jumystary kezinde jebe ushtary, aina, keramika synyqtary, tiyn saqtaityn shaǵyn qumyrany, Ózbek han tusyndaǵy teńgeler men monetalardy tapqan.
Ǵalymdar bul jerde XIV ǵasyrda saýda kerýenderi toqtaityn kerýen saraiy bolǵan dep boljaidy.
«Osy jyldyń maýsym aiynda arheologiialyq qazba jumystaryn bastadyq. Ashysai ózeniniń jaǵasynda kerýen saraiy, halyq turatyn tutas bir eldi meken bolǵanyn dáleldeitin jádigerlerdi taptyq. Kóne qumyranyń synyqtary men qysh ydystar barlyq aýmaqta kezdesedi. Arheologiialyq jumystar endi ǵana bastaldy. Biz bul aýmaqty zerttep, qazba jumystaryn júrgizemiz», – deidi Atyraý oblystyq tarihi-mádeni qoryq-murajaiynyń bas inspektory Aibek Turaruly.
Ǵalymdar kóne kerýen saraiy ornyn Qazaqstannyń tarihi-mádeni qundylyqtary tizimine engizýdi usyndy.
