Foto: © atpress.kz
Atyraý oblysynda Qazaqstan ánuranyna laiyqty qurmet kórsetpegen azamatqa 170 myń teńge aiyppul salyndy, dep habarlaidy "Ult aqparat" AtyrauPress portalyna silteme jasap.
16 qyrkúiekte Atyraý oblysy Maqat aýdanynda «Zarnitsa» áskeri-sporttyq oiyny bastalarda Memlekettik Gimn oryndalǵan. Sol kezde alǵashqy áskeri daiyndyq pániniń muǵalimi oń qolyn júrek tusyna eki saýsaqpen qoiyp, Ánuranǵa qurmet kórsetpegen.
Osyǵan bailanysty Memlekettik rámizderdi nasihattaý jónindegi ulttyq ortalyq oblystyq ishki saiasat basqarmasy men aýdan ákimine usynys joldaǵan. Iaǵni atalǵan azamatty QR ÁQBtK-niń 458-baby («QR Memlekettik Týyn, Eltańbasyn, Gimnin paidalaný jáne oryndaý tártibin buzý») 1-bólimine sáikes kináli dep tanyp, ákimshilik jaýapkershilikke tartýdy suraǵan.
«E-Ótinish» júiesine tirkelgen shaǵym politsiia departamentinde qaraldy. Kináli azamat anyqtalyp, oǵan zańǵa sáikes ákimshilik aippul salyndy», - deidi Jergilikti politsiia qyzmeti basqarmasynyń bastyǵy Erlan Biǵambaev.
Osylaisha, kináli tulǵa 50 ailyq eseptik kórsetkish, iaǵni 172 500 teńge aiyppul arqalap otyr. Eger ony bir apta ishinde tólep úlgerse, tek jartysyn ǵana óteidi.
Al, Memlekettik rámizderdi nasihattaý jónindegi ulttyq ortalyqtyń direktory Rýslan Hamzanyń aitýynsha, osyǵan uqsas jaǵdai osydan tórt jyl buryn oryn alǵan.
«Atyraý qalasyndaǵy «Shapaǵat» destrýktivtik dini aǵymdardan japa shekkenderge kómek kórsetý ortalyǵynyń uiymdastyrýymen dini birlestikter arasynda shaǵyn fýtboldan ashyq týrnir ótken bolatyn. Jarystyń basynda QR Ánurany oryndalǵan sátte oń qolyn júrek tusyna qoimaǵan, iaǵni, memlekettik rámizge qurmet kórsetpegen elimizdiń eki azamaty QR ÁQBtK-niń 458-baby 1-bólimine sáikes kináli dep tanyldy. Olarǵa qatysty ákimshilik quqyqbuzýshylyq týraly hattama toltyrylyp, aiyppul salyndy», - deidi ol.
Aita keteiik, «Meniń Qazaqstanym» 2006 jyly 6 qańtarda resmi túrde Parlamentte talqylanyp, memlekettik Gimn bolyp bekitildi. Onyń mátinine Tuńǵysh Prezident tarapynan qosymsha ózgerister engizilgenin kópshilik jaqsy biledi. Ánuran oryndalǵanda jurtshylyq oryndarynan turyp, oń qolyn sol jaq keýdesine – júrek tusyna qoiady.
