Atyraýdaǵy bazarlardyń birinde adam ólimimen aiaqtalǵan kikiljińge qatysty jańa derekter paida boldy. Eki adam arasyndaǵy janjalǵa kóliktiń syrylyp ketýi sebep bolǵan, - dep habarlaidy "Ult aqparat" Almaty.tv málimetine silteme jasap.
Buǵan deiin áleýmettik jelide er adamnyń soqqyǵa jyǵylǵan sáti túsirilgen video taraǵan bolatyn.
Kýágerlerdiń aitýynsha, jábirlenýshiniń abaisyzda basqa adamnyń kóligin syryp ketýi sebebinen janjal týǵan. Ashýǵa býlyqqan júrgizýshi eshbir sheshimge kelýge tyryspai, marqumdy ura bastaǵan. Ol aýrýhanada alǵan jaraqatynan qaitys boldy. Marqumnyń artynda qaiǵy jutyp tutas áýlet, 4 balasy men 5 nemeresi qalǵan.
"Amandaq aǵamyz – elge qyzmet qylǵan aýylymyzdyń syily azamaty. Eldiń alǵysyn arqalaǵan, jaqsylyqtyń jarshysy, aqkóńil, adamdy renjitpek túgili, jándikke ziiany timeitin. Ol kisi qolynan qaza taýyp, aýylymyzdyń qabyrǵasyn qaiystyrdy", – dedi marqumnyń týysy.
Alǵashqylardyń biri bolyp oqiǵa ornyna marqumnyń qyzy jetken. Ol "ákemdi jedel járdem kóligine otyrǵyzyp jatqanda, ol er adam áli de balaǵat sóz aityp jatqan" deidi.
Qazir atalǵan iske qatysty tergeý bastalǵan. Atyraý oblystyq Politsiia departamentiniń bastyǵy isti tikelei jeke baqylaýǵa alǵanyn habarlady.
"Densaýlyqqa qasaqana aýyr ziian keltirip, adam ólimine alyp kelý deregi boiynsha qylmystyq is qozǵaldy. Kúdikti dereý izin sýytpai ustalyp, ýaqytsha ustaý izoliatoryna qamaldy. Qazirgi ýaqytta sot-meditsinalyq saraptama taǵaiyndaldy", – dedi Atyraý oblystyq Politsiia departamentiniń bastyǵy Nurhat Orazbaev.
