Atyraý oblysynda 6 adam karantinde jatyr, dep habarlaidy "Ult aqparat".
Bul týraly búgin Atyraý oblystyq densaýlyq saqtaý basqarmasynyń basshysy Baitolla Ǵazizov málim etti.
«Atyraýda koronavirýs infektsiiasynyń kúdigimen 6 adam 1A sanatymen karantinde jatyr. Olarǵa provizorlyq statsionarda 14 kún meditsinalyq baqylaý júrgiziledi. Sonymen birge, №2 oblystyq aýrýhanada úsh adam dáriger baqylaýyna alyndy. Olar – Almaty, Nur-Sultan qalalarynda koronavirýs juqtyrǵan naýqastarmen qarym-qatynasta bolǵan azamattar» - dedi oblystyq densaýlyq saqtaý basqarmasynyń basshysy Baitolla Ǵazizov.
Sondai-aq, onyń aitýynsha, Reseidegi Samara qalasynan kelgen azamat JRVI belgisimen Inder aýdanyndaǵy aýrýahanaǵa jatqyzyldy. Al, jýyrda AQSh-qa sporttyq jarysqa baryp kelgen paravoleibol komandasynyń músheleri 24 kún turǵylyqty jerinde meditsinalyq baqylaýǵa alyndy.
