Atyraý oblysynda osy jyldyń tamyz aiynyń sońyna deiin infektsiialyq aýrýhana salynyp, paidalanýǵa berilýi múmkin. Bul týraly búgin Úkimet otyrysynda Atyraý oblysynyń ákimi Mahambet Dosmuhambetov aitty, dep habarlaidy QazAqparat.
«Óńirde 595 oryndyq infektsiialyq statsionar, onyń ishinde Atyraý qalasynda №2 oblystyq aýrýhanada - 180 oryn, Teńiz kenishinde - 315 jáne Mahambet aýdanyndaǵy dispanserde 100 oryn uiymdastyryldy. Oblystaǵy 280 oryndyq infektsiialyq statsionarda 198 naýqas em alyp, kórsetkish 70,7 paiyzdy qurap otyr. Al Teńizde uiymdastyrylǵan 315 oryndyq statsionarda búgingi kúni 164 naýqas em qabyldaýda. Búgin oblys boiynsha aýrý belgilerimen tirkelgen 17 jaǵdaidyń 15-i jáne aýrý belgileri joq 82 jaǵdaidyń 63-i qala men aýdandarǵa tiesili. Óńirimizde kóptegen kásiporyn bar ekendigin bilesizder. 35 myń adam vahtalyq aýysymmen jumys isteidi. Atalǵan máselelerdi eskere otyryp, oblys aýmaǵynda kópbeiindi infektsiialyq aýrýhananyń qajettiligi týyndap otyr», - dedi oblys ákimi.
Onyń atap ótýinshe, buǵan deiin Energetika ministrligimen birge Soltústik Kaspii jobasynyń merdiger kompaniialarymen atalǵan aýrýhana qurylysyna bailanysty kelissózder júrgizilgen.
«Tolyqqanda nátijege jetken jaǵdaida aýrýhana qurylysyn tamyz aiynyń sońynda aiaqtaý múmkindigin kórip otyrmyz», - dedi Mahambet Dosmuhambetov.
Atyraý oblysy ákiminiń dereginshe, óńirde aýrý belgileri joq naýqastardyń kóbeiýi saldarynan úidegi ambýlatoriialyq baqylaýǵa alynǵan adamdar sany 624-ke jetti. Úi jaǵdaiynda ózin-ózi oqshaýlaýǵa múmkindigi joq naýqastardyń karantindik statsionarlardaǵy sany sońǵy eki apta ishinde 31-den 200-ge deiin kóbeidi. Oblystyq aýrýhanada ókpeni jasandy jeldetý apparatyna qosylǵan jaǵdaiy aýyr 6 naýqas em alýda.
«Oblysymyzda qonaqúiler men jataqhanalarda karantindik statsionarlar uiymdastyryldy. Sondai-aq 150-den astam meditsina qyzmetkerlerine jumys aýysymynan tys ýaqytta demalýǵa arnaiy qonaqúiler bólindi», - dedi ol.
