Atyraý oblysynda 11 kún buryn iz-túzsiz joǵalyp ketken 30 jastaǵy jigitti izdeý toqtatyldy, dep habarlaidy "Ult aqparat".
Atyraý qalasyna taiaý ornalasqan Qaiyrshaqty aýylynynyń turǵyny, 30 jastaǵy Naýryz Áitekeshov 5 aqpan kúni keshki mezgilde úiinen shyǵyp ketip, qaita oralmaǵan bolatyn. Tórt kúnnen soń ony izdeýge tikushaq jumyldyryldy.
Oblystyq Tótenshe jaǵdailar departamenti Órt sóndirý jáne avariialyq-qutqarý jumystary qyzmeti basshysynyń orynbasary Samat Qumashevtiń aitýynsha, 15 aqpan kúni keshke joǵalǵan jigitti izdeý toqtatyldy.
«Ókinishke qarai, izdestirý jumystarynan nátije bolmady. On kúnde Jaiyq ózeniniń eki jaǵalaýyndaǵy eldi mekender, onyń ishinde qalanyń aýmaǵy, týristik bazalar men qystaýlar, saiajailar tekserildi. Sondai-aq, qaraýsyz qalǵan qurylys nysandaryna, qudyqtar men transheialarǵa da barlaý jasaldy», - dedi ol.
Onyń málimetinshe, izdestirý jumysyna arnaiy kólikter, tikushaq, qyzmettik itteri bar kinologtar toby, eriktiler tartylǵan.
