«Atyraý-Oral» avtomobil joly jańa talaptarǵa sáikes salynady, dep habarlaidy "Ult aqparat".
«Respýblikalyq mańyzǵa ie «Atyraý-Oral» avtomobil jolynda (75-125 shaqyrym) qaita jańartý jumystaryn júrgizýge arnalǵan jobalyq-smetalyq qujattamany ázirleitin kompaniiany anyqtaý maqsatynda tiisti protsedýralar bastalǵan. Osylaisha, JSQ daiyn bolǵan soń, jolshylar tasjoldyń 50 shaqyrymynda qurylys-montajdaý jumystaryna kirisetin bolady», - delingen QR IIDM baspasóz qyzmetiniń málimetinde.
Atap aitqanda, «Atyraý-Oral» avtomobil joly – eki oblys ortalyǵyn bailanystyrýshy mańyzdy tranzittik kóliktik dáliz. Ol Kaspii teńiziniń porttaryna shyǵýǵa múmkindik beredi. Jol osydan 15 jyl buryn jóndeýden ótken bolatyn. Úshinshi tehnikalyq sanattaǵy tasjoldyń qurylymy ostik júktemesi 8 tonnaǵa deiingi kólik quraldaryna laiyqtalyp, táýligine shamamen 3000 kólikti ótkize alady. Búginde Qazaqstanda avtomobil joldaryn salý men qaita jańartý oske 13 tonnaǵa deiingi eseptik júktememen júzege asyrylady. Tiisinshe, atalmysh joldyń jańǵyrtylýy qos óńir úshin asa qajet.
«Jol qaita jańartý jumystarynan ótken soń tórt jáne eki jolaqty bolady. Búgingi tańda avtomobil jolynyń ýchaskesinde (75-125 shaqyrym) qaita jańartý jumystaryn júrgizýge arnalǵan JSQ ázirleitin jobalyq kompaniia anyqtalǵan. Joba osy protsedýralar aiaqtalǵan soń iske asyryla bastaidy», - dep atalyp ótken habarlamada.
Aita ketý kerek, joba avtomobil jolynyń ótkizý qabiletin arttyrýǵa, joldaǵy apattylyqty tómendetýge, Atyraý jáne Batys Qazaqstan oblystarynyń áleýmettik-ekonomikalyq damýyn jaqsartýǵa, sondai-aq, Qazaqstannyń tranzittik áleýetin aitarlyqtai arttyrýǵa múmkindik bermek.
Eske salaiyq, «Atyraý-Oral» avtomobil joly 2020-2025 jyldarǵa arnalǵan «Nurly jol» memlekettik baǵdarlamasy aiasynda qaita jańartylady.
