Atyraý oblysynda elektr jelilerinde bolǵan apatty jaǵdailardy joiý jumystary júrgizilip jatyr. Bul týraly QR Energetika ministrliginen málim etti, dep habarlaidy QazAqparat.
«27 shildede saǵat 18:08-de Atyraý oblysynda aýa raiynyń qolaisyzdyǵy (jańbyr, naizaǵai, daýyldy jel) sebebinen «Qurmanǵazy» munai aidaý stantsiiasyn qorektendiretin baǵanadaǵy 220 kV-tyq 2 elektr jelisi (ÁJ) bir mezgilde óship qaldy. ÁJ «Qazaqstannyń Kaspii qubyr konsortsiýmy» AQ-nyń teńgeriminde. Elektr berý jelileriniń qulaǵan baǵanalary tabyldy. Bul «Qazaqstannyń Kaspii qubyr konsortsiýmy» AQ-ny energiiamen qamtýda 16 MVt-qa deiin shekteýge ákeldi.
Sondai-aq Atyraý munai óńdeý zaýytynda qorektendirýshi jelilerdiń iske qosý tetikteri de óship qaldy.
«Karabatan Utility Solution» elektr stantsiiasynyń energiia júiesimen bailanys jelileri óship qalyp, saldarynan elektr stantsiiasy generatsiiany nólge deiin tómendetti.
Qazirgi ýaqytta tehnologiialyq buzýshylyqtardy joiý boiynsha jumystar júrgizilýde», - delingen ministrlik habarlamasynda.
Eske salaiyq, búgin keshke Atyraý munai óńdeý zaýytynda elektr energiiasy sóngen bolatyn.
«KEGOC» AQ elektr qýatyn jospardan tys toqtatyp tastady. Sonyń saldarynan Atyraý munai óńdeý zaýytynda elektr qýaty bolmady. Osyǵan bailanysty zaýyt jumysy avariialyq jaǵdaida toqtatyldy. Tótenshe jaǵdaidyń aldyn alý úshin syrtqy elektrmen jabdyqtaý júiesi tolyq turaqtanǵansha, zaýyttyń otyn jelisi tehnologiialyq reglamentke sáikes alaý júiesine baǵyttalady. «KEGOC» AQ-nyń elektr berýdi toqtatýy jospardan tys bolyp otyr. Bul óndiristiń jumysyna keri áser etedi», - delingen edi zaýyt málimetinde.
