Atyraý oblysynyń ákimi Mahambet Dosmuhambetov keshe Teńiz kenishine baryp, ondaǵy ahýalmen tanysqan soń shuǵyl jiyn ótkizdi, dep habarlaidy "Ult aqparat" óńirlik kommýnikatsiialar qyzmetine silteme jasap.
«Atyraý oblysynda jaǵdai turaqtanǵanymen, Teńiz kenishindegi ahýal áli de alańdatady»,- dep málimdedi Mahambet Dosmuhambetov. Sonymen qatar, Teńiz kenishindegi jaǵdaidy retteý máselesi talǵylanǵan májiliste, «qazirgi kezde «Teńiz» kenishinde ornalasqan 25 jataqhanada turatyn 42 mekemeniń 709 jumysshysynan COVID-19 infektsiiasy anyqtaldy. 20 mamyrdaǵy málimet boiynsha, 615 naýqastyń 594-i aýrýhanaǵa jatqyzylǵan. Jaǵdai áli de kúrdeli«, - dep atap ótti aimaq basshysy.
Jiyn barysynda oblys ákimdigi tarapynan qurylǵan arnaiy shtabtyń atqarýshy basshysy Aslan Bekjanov, Jylyoi aýdandyq bas sanitarlyq dárigeri Talǵat Habibýllin, Densaýlyq saqtaý ministrligi komitet tóraǵasynyń orynbasary Nurhan Sádýaqasov, «Teńizshevroil» JShS óndiris operatsiialary boiynsha menedjeri Garri Enk qalyptasqan jaǵdai týraly baiandama jasady.
Jiyndy qorytyndylǵan Mahambet Dosmuhambetov Teńiz qalashyǵyndaǵy oblystyq shtab filialy men «Teńizshevroil» kompaniiasyna birqatar naqty tapsyrmalar berdi. Atap aitqanda, karantinge jabylǵan vahtalyq qalashyqtarǵa qatań baqylaý jasaý, sanitarlyq-dezinfektsiialyq rejimdi baqylaý, túsindirme jumystaryn barynsha arttyrý, provizorlyq statsionardy meditsinalyq mamandarmen qamtamasyz etýdi jedeldetýdi eskertti. Sondai-aq «Teńizshevroil» kompaniiasyna merdiger mekemelermen birlese otyryp jumys merzimi bitken qyzmetkerlerdi Teńiz kenishinen kelisilgen talaptardy qatań saqtai otyryp shyǵarý josparlaryn ázirleýdi júktedi.
Teńiz kenishinde 18 naýryzdan bastap aýdan ákimshiligi janynan qurylǵan shtab, sondai-aq 20 sáýirden bastap oblystyq shtabtyń filialy jumys isteýde. Budan ózge, kúni keshe quramyna Atyraý oblysy ákiminiń eki birdei orynbasary, birqatar oblystyq departamentter men quqyq qorǵaý organdarynyń basshylary, TShO basshylyǵy jáne oblystyń Bas dárigeri men Densaýlyq saqtaý ministrligi Taýarlar men qyzmetterdiń sapasy men qaýipsizdigin baqylaý komiteti tóraǵasynyń orynbasary kiretin arnaiy jumys toby Teńiz kenishine baryp, jumys istep jatyr.
Eske sala keteiik, ótken aptada Atyraýǵa Premer-Ministrdiń orynbasary Eraly Toǵjanov shuǵyl saparmen kelip, Teńiz kenishindegi jaǵdaidy turaqtandyrýǵa qatysty birqatar tapsyrma bergen bolatyn.
