© Sputnik / Abzal Kaliev
Kúni keshe atys bolǵan Atyraý oblysynyń Saǵyz aýylynda politsiia qyzmetkerleri úshin kúsheitilgen jumys rejimi engizildi, dep habarlaidy "Ult aqparat".
Oblystyq politsiia departamentiniń bastyǵy, politsiia polkovnigi Qamza Úmbetqalievtyń aitýynsha, politsiia qyzmetkerleri Qyzylqoǵa aýdanyndaǵy Saǵyz aýylynda qoǵamdyq tártipti turaqtandyrý men turǵyndardyń qaýipsizdigin qamtamasyz etý úshin jumyldyrylǵan.
«Qazir atalǵan aýyldaǵy jaǵdai turaqtandy. Turǵyndar arasynda jappai tolqý baiqalmaidy. Soǵan qaramastan, tártip saqshylary Saǵyz aýylyn táýlik boiy patrýldep, kúsheitilgen rejimde jumysyn jalǵastyryp jatyr. Oqiǵa ornynda Atyraý oblystyq politsiia departamentiniń jedel-tergeý toby jumys isteýde. Atalǵan derekke qatysty QR Qylmystyq kodeksiniń 99-babynyń 2-bóligimen (Adam óltirý) tergeý júrip jatyr», - deidi Qamza Úmbetqaliev.
Aita keteiik, senbi, 30 qazan kúni keshki saǵat jeti jarym shamasynda Atyraý oblysynyń Qyzylqoǵa aýdanynda, Atyraý-Aqtóbe tas jolynda, Saǵyz aýylynyń mańynda atys boldy.
Áýeli Saǵyz aýyldyq dárigerlik ambýlatoriiasyna jaraqat alǵan alty adam jetkizilgeni týraly habarlandy. Keiinirek 36 jastaǵy er adamnyń kóz jumǵany belgili boldy.
"Kisi óltirý" baby boiynsha tergeý bastaldy", - dep habarlady politsiia.
Atysqa aýyl turǵyndary arasyndaǵy janjal sebep bolǵan degen boljam jasalyp otyr.
