Atyraý oblysynyń Mahambet aýdanynda býma shóp órtenip, 3 bala qaitys boldy, - dep habarlaidy Tengrinews.kz QR TJM ókiline silteme jasap.
2021 jyldyń 5 qazanynda saǵat 19:27-de kezekshi pýltine Mahambet aýdany, Ortaqshyl aýyly, Jaskelenov kóshesindegi úidiń aýlasyna jinalǵan 22 dana býma shóp janyp jatqany týraly habar kelip túsken.
Oqiǵa ornyna №11 ÓSB-niń órt sóndirýshileri 19:45-te jetip, órt 23:07 minýtta tolyǵymen sóndirilgen.
Alaida, 6 qazan kúni 00:02 minýtta Mahambet aýdandyq politsiia bóliminen Ortaqshyl aýylynda kámelet jasyna tolmaǵan úsh bala belgisiz jaǵdaida joǵalǵany týraly habarlama kelgen.
"Izdestirý jumystaryna TJD 11 qyzmetkeri, 3 dana tehnikasy, 2 kinologiialyq esep, politsiia departamenti qyzmetkerleri men aýyl turǵyndary jumyldyryldy. Joǵalǵan 2014 jylǵy eki bala men 2012 jylǵy bir balanyń denesi órtengen shóptiń arasynan tabyldy. Olardyń denesi PD qyzmetkerlerine tapsyrylyp, sot-meditsinalyq saraptamasy taǵaiyndaldy. Qurmetti qazaqstandyqtar! QR TJM órt qaýipsizdigi sharalaryn qatań saqtaýdy jáne balalardy qaraýsyz qaldyrmaýdy eskertedi", - deidi QR TJM baspasóz qyzmeti ókili.
