Atyraý oblysyndaǵy Inder aýdandyq aýrýhanasynda ottegi stansasy iske qosyldy, dep habarlaidy "Ult aqparat".
Oblystyq densaýlyq saqtaý basqarmasy baspasóz qyzmetiniń málimetinshe, qazir óńirdegi 7 aýrýhanada ortalyqtandyrylǵan ottegi stansasy jumys istep tur. Onyń ekeýi Qurmanǵazy men Qyzylqoǵa aýdanynda iske qosylǵan. Sondai-aq, Atyraý qalasyndaǵy oblystyq perinataldyq jáne kardiologiialyq ortalyqtarda, oblystyq aýrýhana men №2 infektsiialyq, sondai-aq, byltyr ashylǵan modýldi infektsiialyq aýrýhanalarda da ottegi stansasy bar.
«Óńirdegi 8-shi ottegi stansasy Inder aýdandyq aýrýhanasynda iske qosyldy. Endi Jylyoi aýdanynyń ortalyǵy – Qulsary qalasynda salynyp jatqan modýldi infektsiialyq aýrýhanaǵa da ottegi stansasyn ornatý josparlanyp otyr», -dep habarlady basqarmanyń baspasóz qyzmeti.
