Atyraý oblysynda politsiia inspektory jol apatyna sebepker boldy, dep habarlaidy QazAqparat.
Jol apaty 17 qarashada Jylyoi aýdanynyń ortalyǵy – Qulsary qalasynda bolǵan. Bul derekti oblystyq politsiia departamentiniń baspasóz qyzmeti rastady.
«Qulsary qalasyndaǵy «Keń Jylyoi» shaǵyn aýdanynda jergilikti ýaqytpen saǵat 15:30 shamasynda «Lada–21214» markaly qyzmettik kólikti basqarǵan iývenaldy politsiia tobynyń inspektory basty jolda kele jatqan «Toyota Alphard» kóligine jol bermegen. Sonyń saldarynan jol-kólik oqiǵasyna sebepker boldy. Sot-meditsinalyq saraptamanyń qorytyndysyna sáikes, eki kóliktiń júrgizýshisi mas kúide bolmaǵany jáne dene jaraqattaryn almaǵany anyqtaldy» -dep málim etti departamenttiń baspasóz qyzmetinen.
Qazir jol-qaýipsizdik erejesi talaptaryn oryndamaǵan politsiia qyzmetkerine qatysty QR Ákimshilik quqyqbuzýshylyq týraly kodesiniń 610-babymen hattama toltyrylǵan. Atalǵan derekke bailanysty oblystyq politsiia departamentiniń ózindik qaýipsizdik basqarmasy qyzmettik tergeý júrgizip jatyr.
